ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃចន្ទនេះថា មេដឹកនាំកូរ៉េខាងជើង លោក គីម ជុងអ៊ុន បានបញ្ជាឲ្យសាងសង់មន្ទីរពេទ្យទំនើបបន្ថែមទៀត ដែលជាផ្នែកនៃកិច្ចខិតខំប្រឹងប្រែងបន្ត ដើម្បីអភិវឌ្ឍន៍តំបន់ដែលមិនទាន់មានការរីកចម្រើន នៅខាងក្រៅទីក្រុងព្យុងយ៉ាង។

ទិសដៅនេះ ត្រូវបានដាក់ចេញក្នុងអំឡុងពេលដំណើរទស្សនកិច្ចរបស់លោក គីម ជុងអ៊ុន ទៅកាន់រោងចក្រក្នុងតំបន់នានាដែលបច្ចុប្បន្នកំពុងសាងសង់ កាលពីថ្ងៃសៅរ៍ និងថ្ងៃអាទិត្យ ជាកន្លែងដែលលោក«ដាក់ចេញនូវគោលនយោបាយថ្មី ដើម្បីពន្លឿនការអនុវត្តបេសកកម្មជាប្រវត្តិសាស្ត្រនៃការស្តារឡើងវិញក្នុង    តំបន់។ នេះបើយោងតាមទីភ្នាក់ងារសារព័ត៌មានមជ្ឈិមកូរ៉េ (KCNA) ។ .

ប្រទេសកូរ៉េខាងជើង បាននិងកំពុងផ្តល់អាទិភាពដល់ការអភិវឌ្ឍសេដ្ឋកិច្ចនៅក្នុងបណ្តាខេត្តដែលមិនទាន់មានការរីកចម្រើន បន្ទាប់ពីការប្តេជ្ញាចិត្តរបស់លោក គីម ជុងអ៊ុន ក្នុងការធ្វើទំនើបកម្មរោងចក្រ នៅក្នុងតំបន់ចំនួន ២០ ក្នុងរយៈពេលមួយទសវត្សរ៍ខាងមុខ។ អ្វីដែលហៅថាគោលនយោបាយអភិវឌ្ឍន៍តំបន់ ២០-១០ មានគោលបំណងលើកកម្ពស់នូវអ្វីដែលរបបនេះ សំដៅទៅលើសម្ភារៈមូលដ្ឋាន និងកម្រិតជីវភាពវប្បធម៌របស់ប្រជាជន។

សារព័ត៌មាន KCNA បានរាយការណ៍ថា គោលនយោបាយថ្មី រួមមានការសាងសង់កន្លែងសុខភាពសាធារណៈបន្ថែម មជ្ឈមណ្ឌលសិក្សាវិទ្យាសាស្ត្រ និងបច្ចេកវិទ្យា និងស្ថានីយគ្រប់គ្រងគ្រាប់ធញ្ញជាតិ ជាការបន្ថែមពីលើការអភិវឌ្ឍដែលកំពុងបន្តនូវរោងចក្រឧស្សាហកម្មក្នុងតំបន់។

ក្នុងអំឡុងដំណើរទស្សនកិច្ចរបស់ខ្លួន លោក គីម បានសម្តែងការពេញចិត្តចំពោះការវិវឌ្ឍ ដោយកត់សម្គាល់ថា គម្រោងសាងសង់រួម សម្រេចបានជាង ៨០ភាគរយហើយ។