មន្ត្រីជាន់ខ្ពស់ម្នាក់របស់អង្គការសហប្រជាជាតិ UN បាននិយាយថា ប្រតិបត្តិការជំនួយរបស់អង្គការនេះនៅតំបន់ហ្កាហ្សា ត្រូវផ្អាកកាលពីថ្ងៃចន្ទ (២៦ សីហា) បន្ទាប់ពីអ៊ីស្រាអែល ចេញបញ្ជាជម្លៀសថ្មីកាលពីថ្ងៃអាទិត្យ សម្រាប់ទីក្រុង ដឺអាល់បាឡា (Deir Al-Balah) នៅកណ្តាលតំបន់ហ្កាហ្សា ជាទីដែលមជ្ឈមណ្ឌលប្រតិបត្តិការរបស់អង្គការសហប្រជាជាតិស្ថិតនៅ។

បញ្ជាជម្លៀសនេះកើតឡើងនៅពេលដែលអង្គការសហប្រជាជាតិកាលពីថ្ងៃសៅរ៍ រៀបចំចាប់ផ្តើមយុទ្ធនាការចាក់វ៉ាក់សាំងកុមារប្រមាណ ៦៤០.០០០នាក់នៅហ្កាហ្សា ជាទីដែលអង្គការសុខភាពពិភពលោក (WHO) និយាយថា ទារកអាយុ ១០ខែម្នាក់បានពិការដោយសារវីរុសជំងឺស្វិតដៃជើងប្រភេទទី២ ដែលជាករណីទីមួយនៅលើទឹកដីហ៊ុមព័ទ្ធនេះក្នុងរយៈពេល ២៥ឆ្នាំ។

មន្ត្រីជាន់ខ្ពស់ដែលសុំមិនបញ្ចេញឈ្មោះរូបនោះនិយាយថា អង្គការសហប្រជាជាតិកាលពីមុនបានផ្លាស់ប្តូរទីតាំងមជ្ឈមណ្ឌលប្រតិបត្តិការសំខាន់របស់ខ្លួននៅតំបន់ហ្កាហ្សាស្ទ្រីប និងបុគ្គលិកភាគច្រើនរបស់ខ្លួនទៅកាន់ទីក្រុង ដឺអាល់បាឡា នេះបន្ទាប់ពីអ៊ីស្រាអែល បានបញ្ជាឱ្យជម្លៀសទីក្រុងរ៉ាហ្វា (Rafah) នៅភាគខាងត្បូងហ្កាហ្សាជាច្រើនខែមុន ហើយបញ្ជាជម្លៀសថ្មីភ្លាមៗនេះធ្វើឱ្យបុគ្គលិកមិនអាចយកសម្ភារៈប្រតិបត្តិការបាន។ មន្ត្រីរូបនោះបន្ថែមថា ប្រតិបត្តិការរបស់អង្គការសហប្រជាជាតិ មិនត្រូវបានផ្អាកជាផ្លូវការទាំងស្រុងទេ ដោយបុគ្គលិកនៅមូលដ្ឋានព្យាយាមស្វែងរកវិធីដើម្បីបន្តការងារក្នុងស្ថានភាពដ៏លំបាកបំផុត។

លោក សេម រ៉ូស (Sam Rose) នាយកជាន់ខ្ពស់នៃទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) បាននិយាយថា ទីភ្នាក់ងារនៅតែគ្រប់គ្រងការផ្តល់សេវាសុខភាព និងសេវាផ្សេងទៀតកាលពីថ្ងៃចន្ទ ប៉ុន្តែសង្កត់ធ្ងន់ថា ខណៈពេលដែល UNRWA ប្រតិបត្តិការខុសពីប្រព័ន្ធដទៃទៀតរបស់អង្គការសហប្រជាជាតិ ទីភ្នាក់ងារនេះនៅតែប្រឈមមុខនឹងបញ្ហាប្រឈមជាច្រើនដូចគ្នានេះ៕