​បាល់ទាត់៖ អតីត​ខ្សែប្រយុទ្ធ Chelsea, Newcastle និង West Ham, Demba Ba បានប្រកាស​ចូលនិវត្តន៍​ពី​អាជីព​កីឡាករបាល់ទាត់​ហើយ​ក្នុង​វ័យ ៣៦ឆ្នាំ​។ ​​អតីត​កីឡាករ​ជំរើសជាតិ​សេ​ណេ​ហ្កា​ល់​រូបនេះ​ធ្លាប់​ឈ្នះ​ជើងឯក UEFA Europa League ជាមួយ Chelsea នៅ​ឆ្នាំ២០១៣ និង​ឈ្នះ​ជើងឯក​លី​គ​កំពូល​ទួ​រគី​ ២លើក​ក្នុង​អាជីព​ជាមួយ Besiktas នៅ​រដូវ​កាល ២០១៦-​១៧ និង​មួយ​លើក​ជាមួយ Istanbul Basaksehir រដូវ​កាល ២០១៩-២០២០​។

​​Demba Ba បាន​នៅ​ទំនេរ​ពី​បាល់ទាត់​តាំង​កាលពី​ខែសីហា​កន្លងទៅ ​ក្រោយ​ចាក​ចេញពី​ក្លិប​ស្វ៊ី​ស Lugano​។ ​​រំលឹកថា Demba Ba ធ្លាប់មាន​អាជីព​នៅ​ទឹកដី​អង់គ្លេស​នៅ​ខែមករា ​ឆ្នាំ​២០១១ ដោយ​ផ្លាស់​ពី​ក្លិប​អាល្លឺម៉ង់ Hoffenheim ទៅកាន់ West Ham បន្ទាប់ពី​បង្ហាញខ្លួន​នៅ​ក្លិប​អាល្លឺម៉ង់ ១០៣លើក​រកបាន ៤០គ្រាប់​។ ​​នៅ West Ham, Demba Ba រកបាន ៧គ្រាប់​ក្នុងការ​បង្ហាញខ្លួន ១៣លើក​ប៉ុណ្ណោះ​មុនពេល​ផ្លាស់​ទៅកាន់ Newcastle ៦ខែ​បន្ទាប់​។

​​នៅ​ជាមួយ Newcastle នោះ Demba Ba បង្ហាញខ្លួន​បាន ៥៧លើក​រកបាន ២៩គ្រាប់ ហើយក៏​ផ្លាស់​ទៅកាន់ Chelsea នៅ​ឆ្នាំ២០១៣ តែ​មិនសូវ​ជាប់​ជំរើស​ដំបូង​ឡើយ​ពោលគឺ​បង្ហាញខ្លួន​សរុប ៥១លើក​ចាប់ផ្តើម ១១នាក់​ដំបូង​បាន​ត្រឹម ២៣លើក​ប៉ុណ្ណោះ និង​រកបាន ១៤គ្រាប់​ដោយ​នៅពេលនោះ​តំណែង​របស់គេ​នៅ​ជួរ​ទី​៣ ពីក្រោម Fernando Torres និង Samuel Eto’o​។ Demba Ba ក៏​ធ្លាប់​ប្រកប​អាជីព​នៅ​ទឹកដី​ចិន​ផងដែរ​ជាមួយ​ក្លិប​ Shanghai Shenhua៕

​អត្ថបទ​៖​នាង សុភា​វុ​ធ