នៅថ្ងៃអង្គារនេះ ក្រុមនគរបាលឥណ្ឌា បានបាញ់ឧស្ម័នបង្ហូរទឹកភ្នែក និងកាណុងទឹកដើម្បីបំបែកហ្វូងមនុស្សនៅទីក្រុង Kolkata ស្របពេលមានការប៉ះទង្គិចគ្នាជាមួយក្រុមបាតុករតវ៉ាប្រឆាំងនឹងករណីចាប់រំលោភសម្លាប់គ្រូពេទ្យហាត់ការ ។

មនុស្សរាប់ពាន់នាក់ នាំគ្នាស្រែកពាក្យស្លោកប្រឆាំងនឹងការចាប់រំលោភសម្លាប់កាលពីថ្ងៃទី ៩ ខែសីហា ហើយនិងបានជួបជុំគ្នានៅក្រោយប៉ារ៉ាស់នគរបាល ស្របពេលដែលក្រុមអាជ្ញាធរបាញ់កាណុងទឹក និងឧស្ម័នបង្ហូរទឹកភ្នែកលើហ្វូងបាតុករ ដើម្បីព្យាយាមបំបែកពួកគេ ។

ក្រោយមកមនុស្សរាប់រយនាក់ នាំគ្នាហែកបារ៉ាស់ ខណៈដែលក្រុមនគរបាលប្រឆាំងបាតុកម្ម ប្រើប្រាស់ដំបងវាយប្រហារលើពួកគេ និងព្យាយាមបញ្ឈប់ពួកគេ ។

ករណីចាប់រំលោភសម្លាប់កាលពីថ្ងៃ ៩ ខែសីហា នៅទីក្រុងភាគខាងកើត Kolkata នាំឲ្យមានការទាមទារស្វែងរកយុត្តិធម៌សម្រាប់ជនរងគ្រោះ និងសុវត្ថិភាពខ្លាំងជាងមុនសម្រាប់ស្រ្តីនៅក្នុងមន្ទីរពេទ្យ ក្នុងនោះគ្រូពេទ្យនៅតាមមន្ទីរពេទ្យជាច្រើន បដិសេធន៍មិនព្រមព្យាបាលអ្នកជំងឺស្រាល ។

គួររំឭកថា នគរបាលស្ម័គ្រចិត្តម្នាក់ ត្រូវបានចាប់ខ្លួនក្នុងករណីបទឧក្រិដ្ឋ ហើយនគរបាល បានបើកការស៊ើបអង្កេតលើករណីមួយនេះ ។

កំហឹងសាធារណជន និងបាតុកម្មប្រឆាំងអំពើហិង្សាលើស្រ្តីនេះដែរ បានធ្វើឲ្យគេនឹកឃើញដល់ករណីចាប់រំលោភបូកលើនិស្សិតវ័យ ២៣ឆ្នាំម្នាក់នៅលើរថយន្តក្រុង ក្នុងរដ្ឋធានីញូវ ដែល្លី កាលពីឆ្នាំ ២០១២ ៕