ប្រតិបត្តិការជំនួយរបស់អង្គការសហប្រជាជាតិ UN នៅតំបន់ហ្កាហ្សាស្ទ្រីប បានបន្តយ៉ាងលំបាកនៅថ្ងៃអង្គារ (២៧ សីហា) មួយថ្ងៃបន្ទាប់ពីមន្ត្រីជាន់ខ្ពស់ UN ម្នាក់បាននិយាយថា កិច្ចខិតខំប្រឹងប្រែងមនុស្សធម៌បានបញ្ឈប់ដោយសារតែបញ្ជាជម្លៀសរបស់អ៊ីស្រាអែល បានបង្ខំឱ្យបិទមជ្ឈមណ្ឌលប្រតិបត្តិការសំខាន់របស់ខ្លួន។

អ្នកនាំពាក្យរបស់អង្គការសហប្រជាជាតិ លោក ស្តេហ្វាន ឌូចារីក (Stephane Dujarric) កាលពីថ្ងៃអង្គារ ហាក់ខឹងសម្បារចំពោះការលើកឡើងពីការផ្អាកផ្ដល់ជំនួយនោះ។ នៅពេលត្រូវសាកសួរថាតើស្ថានភាពនៅហ្កាហ្សាបង្កឱ្យមានការផ្អាកប្រតិបត្តិការជំនួយកាលពីថ្ងៃចន្ទដែរឬទេ លោក Dujarric ប្រាប់អ្នកយកព័ត៌មានថា «ស្ថានភាពនោះពិតជាពិបាកធ្វើកិច្ចការខ្លាំងណាស់ ប៉ុន្តែយើងនៅតែប្រឹងប្រែងបន្តផ្ដល់ជំនួយជាមួយនឹងអ្វីដែលយើងមាន»។

ប្រធានផ្នែកសុវត្ថិភាព និងសន្តិសុខរបស់អង្គការសហប្រជាជាតិ លោក ហ្គីលេស មីឆាត (Gilles Michaud) បាននិយាយថា កាលពីចុងសប្តាហ៍ យោធាអ៊ីស្រាអែលបានជូនដំណឹងតែប៉ុន្មានម៉ោងប៉ុណ្ណោះ សម្រាប់បុគ្គលិក UN ជាង ២០០នាក់ ឱ្យផ្លាស់ចេញពីការិយាល័យ និងកន្លែងស្នាក់នៅក្នុងទីក្រុង ដឺ អាល់បាឡា (Deir Al-Bala) ភាគកណ្តាលហ្កាហ្សា តែការផ្តល់ជំនួយមនុស្សធម៌នៅតែបន្តដោយមានហានិភ័យខ្លាំងបំផុត។

ចាប់តាំងពីសង្រ្គាមហ្កាហ្សាផ្ទុះឡើងមក យោធាអ៊ីស្រាអែល បានវាយលុកតំបន់ហ៊ុមព័ទ្ធប៉ាឡេស្ទីននេះដោយបង្ខំឱ្យប្រជាជនជិត ២,៣លាននាក់ ចាកចេញពីផ្ទះសម្បែង ដែលបណ្តាលឱ្យមានការស្រេកឃ្លាន និងជំងឺដ៏កាចសាហាវ ហើយបានសម្លាប់មនុស្សយ៉ាងហោចណាស់ ៤០.០០០នាក់ នេះបើយោងតាមអាជ្ញាធរសុខាភិបាលប៉ាឡេស្ទីន៕