ការសិក្សាថ្មីមួយបានបង្ហាញពីនិន្នាការគួរឱ្យព្រួយបារម្ភនៃការស្លាប់ទាក់ទងនឹងកម្ដៅនៅទូទាំងសហរដ្ឋអាមេរិក ជាមួយនឹងអត្រាមរណភាពច្រើនជាងទ្វេដងក្នុងពេល ២៥ឆ្នាំ។

ការសិក្សាដែលបានចេញផ្សាយកាលពីថ្ងៃចន្ទ (២៦ សីហា) នៅក្នុងទិនានុប្បវត្តិនៃសមាគមវេជ្ជសាស្ត្រអាមេរិក (AMA) បានពិនិត្យមើលកំណត់ត្រាមរណភាព ដែលកម្ដៅដ៏ខ្លាំងក្លាត្រូវបានចុះបញ្ជីថាជាមូលហេតុចម្បង ឬរួមចំណែកដល់ការស្លាប់ទាំងនោះ។

តាមរយៈការវិភាគទិន្នន័យរបស់មជ្ឈមណ្ឌលគ្រប់គ្រង និងការពារជំងឺ (CDC) ពីឆ្នាំ១៩៩៩ ដល់ឆ្នាំ២០២៣ អ្នកស្រាវជ្រាវរកឃើញថាការស្លាប់ដោយសារកម្ដៅបានកើនឡើងពីតួលេខ ១.០៦៩នាក់ ក្នុងឆ្នាំ១៩៩៩ ដល់ចំនួន ២.៣២៥នាក់ ក្នុងឆ្នាំ២០២៣ ដែលជាកំណើន ១១៧ភាគរយ និងជាតួលេខដ៏ខ្ពស់បំផុត។

ក្រុមអ្នកស្រាវជ្រាវមកពីសាកលវិទ្យាល័យតិចសាស់ នៅទីក្រុង សានអង់តូនីញ៉ូ (San Antonio) សាកលវិទ្យាល័យវិទ្យាសាស្ត្រសុខាភិបាលរដ្ឋ និងសាកលវិទ្យាល័យរដ្ឋ ផិនស៊ីលវេនៀ (PSU) បានគូសបញ្ជាក់ពីកំណើនយ៉ាងខ្លាំងនៃការស្លាប់ក្នុងរយៈពេល៧ឆ្នាំចុងក្រោយនេះ ដែលស្របតាមកំណត់ត្រាកម្ដៅពិភពលោកដ៏ខ្ពស់មិនធ្លាប់មានពីមុនមក ដោយសារផលប៉ះពាល់នៃបម្រែបម្រួលអាកាសធាតុ។

ការរកឃើញនេះក៏ស្របទៅនឹងការសិក្សាសាកល ដែលបង្ហាញថាកំណើនសីតុណ្ហភាពកំពុងជំរុញឱ្យមានការស្លាប់កាន់តែច្រើនទូទាំងពិភពលោក។ យោងតាមមជ្ឈមណ្ឌលជំងឺ CDC របស់អាមេរិកបានឱ្យដឹងថា ជំងឺដែលទាក់ទងនឹងកម្ដៅ ដូចជាការហត់នឿយកម្ដៅ ឬជំងឺសុរិយរោគ (ថប់ដង្ហើមសន្លប់ដោយសារកម្ដៅខ្លាំង) កើតឡើងនៅពេលដែលរាងកាយមិនអាចផ្ដល់ភាពត្រជាក់បានត្រឹមត្រូវ ដោយអាចបណ្តាលឱ្យខូចខាតដល់ខួរក្បាល និងសរីរាង្គសំខាន់ៗដទៃទៀត និងអាចបណ្ដាលឱ្យស្លាប់៕