មន្ត្រីជាន់ខ្ពស់របស់សហរដ្ឋអាមេរិក និងប្រទេសចិន នឹងបិទបញ្ចប់កិច្ចពិភាក្សានៅទីក្រុងប៉េកាំង បន្ទាប់ពីកិច្ចប្រជុំថ្ងៃទី៣ នៅថ្ងៃព្រហស្បតិ៍ (២៩ សីហា) នេះដែលមានបំណងបន្ធូរបន្ថយភាពតានតឹងរវាងមហាអំណាចទាំងពីរនៅមុនការបោះឆ្នោតសហរដ្ឋអាមេរិកថ្ងៃទី០៥ ខែវិច្ឆិកា។

ទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន់ (Jake Sullivan) ប្រមុខការទូតចិន លោក វ៉ាង យី (Wang Yi) និងក្រុមការងាររបស់ភាគីទាំងពីរបានជួបប្រជុំបិទទ្វារនៅរមណីយដ្ឋានមួយនៅជាយក្រុងប្រទេសចិន។ នៅលើរបៀបវារៈនៃកិច្ចពិភាក្សានេះរួមមានទស្សនៈផ្ទុយគ្នារបស់ពួកគេជុំវិញមជ្ឈិមបូព៌ា និងអ៊ុយក្រែន ការទាមទារទឹកដីរបស់ចិន រាប់ចាប់ពីកោះតៃវ៉ាន់ រហូតដល់សមុទ្រចិនខាងត្បូង ការទប់ស្កាត់សារធាតុហ្វង់តានីល និងជម្លោះពាណិជ្ជកម្ម។

នៅក្នុងកិច្ចប្រជុំដ៏វែងមួយកាលពីថ្ងៃពុធ ក្រុមមន្រ្តីបានពិភាក្សាពីលទ្ធភាពនៃកិច្ចចរចាថ្មីក្នុងពេលឆាប់ៗនេះរវាងប្រធានាធិបតីទាំងពីរគឺលោក ចូ បៃដិន (Joe Biden) និងលោក ស៊ី ជីនពីង (Xi Jinping) ព្រមទាំងលទ្ធភាពនៃទំនាក់ទំនងយោធាកម្រិតបញ្ជាការ ដែលជាការចង់បានជាយូរមកហើយរបស់ទីក្រុងវ៉ាស៊ីនតោន។

យោងតាមទូរទស្សន៍រដ្ឋ CCTV លោក Wang បានប្រាប់លោក Sullivan ថា «គន្លឹះនៃការអភិវឌ្ឍន៍ដោយរលូននៃអន្តរកម្មរវាងចិន និងអាមេរិក គឺស្ថិតនៅក្នុងការរាប់អានគ្នាទៅវិញទៅមកដោយស្មើភាពគ្នា»។ សេតវិមានបាននិយាយថា «ភាគីទាំងពីរបានពិភាក្សាយ៉ាងច្បាស់លាស់ ជាក់ស្តែង និងលក្ខណៈស្ថាបនាលើបញ្ហាទ្វេភាគី តំបន់ និងពិភពលោក»។

ក្នុងប៉ុន្មានខែចុងក្រោយនៃតំណែងប្រធានាធិបតីរបស់ខ្លួន លោក Biden បានជំរុញការទូតដោយផ្ទាល់ជាមួយលោក Xi និងកាត់បន្ថយភាពតានតឹង ខណៈអនុប្រធានាធិបតីអាមេរិក លោកស្រី កាម៉ាឡា ហារីស (Kamala Harris) ដែលជាបេក្ខជនបក្សប្រជាធិបតេយ្យក្នុងការបោះឆ្នោតខែវិច្ឆិកា ទំនងជានឹងបន្តយុទ្ធសាស្រ្តស្រដៀងគ្នានេះ។ ប៉ុន្តែអ្នកវិភាគជាច្រើន រួមទាំងបេក្ខជនបក្សសាធារណរដ្ឋ លោក ដូណាល់ ត្រាំ (Donald Trump) យល់ឃើញថា វិធីសាស្រ្តនោះដូចជាទន់ជ្រាយពេកក្នុងការប្រឈមមុខនឹងគោលនយោបាយការបរទេសអះអាងសិទ្ធិរបស់ចិន៕