កាលពីថ្ងៃពុធម្សិលមិញ រដ្ឋាភិបាលអេក្វាឌ័រ បានចាប់ផ្តើមដំណើរការបិទអណ្តូងប្រេងនៅប្លុក 43-ITT ស្ថិតក្នុងតំបន់អភិរក្សធម្មជាតិ ក្រោយកាលពីឆ្នាំមុនក្រុមអ្នកបោះឆ្នោត បានគាំទ្រការធ្វើប្រជាមតិឲ្យបញ្ចប់ការខួងប្រេងនៅតំបន់នោះ ដោយសារក្តីកង្វល់បរិស្ថាន ។

 ក្រសួងថាមពលអេក្វាឌ័រ និយាយនៅក្នុងសេចក្តីថ្លែងការណ៍ថា ពួកគេបានបិទអណ្តូងប្រេងមួយកន្លែងក្នុងចំណោមអណ្តូងប្រេង ២៤៧កន្លែងនៅក្នុងប្លុកមួយនេះ គឺអណ្តូងប្រេង Ishpingo B-56 ដែលជាផ្នែកមួយនៃផែនការដែលគេរំពឹងថា នឹងចំណាយពេលប្រហែល ៥ឆ្នាំកន្លះ ។

 តុលាការធម្មនុញ្ញអេក្វាឌ័រ បានចេញសេចក្តីសម្រេចកាលពីឆ្នាំមុនថា ក្រុមហ៊ុនប្រេងរដ្ឋ Petroecuador មានពេល ១ឆ្នាំ ដើម្បីយកចេញហេដ្ឋារចនាសម្ព័ន្ធនៅក្នុងប្លុកមួយនេះ បើទោះបីជាក្រុមអាជ្ញាធរនិយាយថា ដំណើរការយកចេញ ត្រូវការចំណាយពេលយូរក៏ដោយ ។

 ក្រុមហ៊ុនប្រេង Petroecuador បានបូមប្រេងប្រហែល ៥ម៉ឺនបារ៉ែលក្នុង ១ថ្ងៃនៅប្លុកអណ្តូងប្រេង 43-ITT ចាប់តាំងពីប្រតិបត្តិការចាប់ផ្តើមកាលពីឆ្នាំ ២០១៦ ។

 យោងតាមទិន្នន័យផ្លូវការ បានឲ្យដឹងថា ការផលិតប្រេងឆៅសរុបនៅក្នុងប្រទេសអេក្វាឌ័រ មានប្រហែល ៤៨ម៉ឺនបារ៉ែល ក្នុង១ថ្ងៃ ។

 ដោយឡែក ថ្លៃបញ្ចប់ការខួងប្រេងនៅប្លុកមួយនេះ នឹងមានរហូតដល់ ១,៣ពាន់លានដុល្លារ ។

 រដ្ឋាភិបាល និយាយថា អណ្តូងប្រេងនេះ នឹងត្រូវបិទនៅខែធ្នូ ឆ្នាំ ២០២៩ ប៉ុន្តែដំណើរការយកចេញហេដ្ឋារចនាសម្ព័ន្ធ នឹងចំណាយពេលរហូតដល់ឆ្នាំ ២០៣០ ៕