ទឹកជំនន់ពីភ្លៀងធ្លាក់ខ្លាំងដែលបានចាប់ផ្តើមកើនឡើងនៅដើមខែនេះ បាននាំមកនូវការបំផ្លិចបំផ្លាញ និងបន្ថែមទុក្ខវេទនារបស់ប្រជាជននៅទូទាំងប្រទេសស៊ូដង់ ដែលត្រូវបានរួមរឹតដោយការប្រយុទ្ធគ្នាយ៉ាងខ្លាំងក្លាចំនួន ៥០០ថ្ងៃរួចមកហើយរវាងកងទ័ព និងកងកម្លាំងគាំទ្ររហ័សយោធាប៉ារ៉ា។ គ្រោះធម្មជាតិបានបង្កការបំផ្លិចបំផ្លាញច្រើនជាងជម្លោះទៅទៀត ហើយមកដល់ពេលនេះ ទឹកជំនន់បានសម្លាប់មនុស្សជិត ១៥០នាក់។

នៅជិតទីក្រុង តូកា (Tokar) ក្នុងតំបន់ភាគខាងកើតរបស់ស៊ូដង់ ដែលរហូតមកដល់ពេលនេះបានរួចផុតពីអំពើហិង្សា គេបានមើលឃើញហ្វូងមនុស្សកំពុងជួបការលំបាកក្នុងការធ្វើដំណើរដោយសារផ្លូវស្ពាននានាត្រូវបានកាត់ផ្ដាច់។

នៅកន្លែងផ្សេងទៀតក្នុងរដ្ឋសមុទ្រក្រហមភាគខាងកើត ទំនប់ អាបាត (Arbaat) បានបាក់កាលពីថ្ងៃអាទិត្យ ដោយគំរាមកំហែងការផ្គត់ផ្គង់ទឹកសាបសម្រាប់ទីក្រុង ផតស៊ូដង់ (Port Sudan) ដែលជារដ្ឋធានីតាមជាក់ស្ដែងរបស់ប្រទេស និងជាជម្រកសម្រាប់ជនភៀសខ្លួនរាប់សែននាក់។ អ្នកស្រុកខ្លះទៀតត្រូវបានជាប់គាំងនៅលើទីទួលខ្ពស់ដោយគ្មានស្បៀងអាហារ និងមានសង្ឃឹមតិចតួចណាស់ក្នុងការទទួលបានជំនួយសង្គ្រោះ។ យោងតាមអង្គការសហប្រជាជាតិបានឱ្យដឹងថា អ្នកស្រុករាប់រយគ្រួសារក៏ត្រូវបានជម្លៀសនៅក្នុងរដ្ឋភាគខាងជើងស៊ូដង់ ដែលភាគច្រើនមិនត្រូវបានប៉ះពាល់ដោយការប្រយុទ្ធគ្នា។

នៅតំបន់ ដាហ្វឺ (Darfur) ជាទីដែលមនុស្សរាប់លាននាក់ត្រូវបានគំរាមកំហែងដោយវិបត្តិអត់ឃ្លានធ្ងន់ធ្ងរ ភ្លៀងបានបំផ្លាញជំរំភៀសខ្លួន និងពន្យារពេលការមកដល់នៃជំនួយដ៏សំខាន់ នេះបើយោងតាមកម្មវិធីអាហារពិភពលោក WFP។ អង្គការសហប្រជាជាតិបានប៉ាន់ប្រមាណថា មនុស្សជាង ៣០០.០០០នាក់ត្រូវបានរងផលប៉ះពាល់ដោយទឹកជំនន់ដ៏មហន្តរាយនេះ៕