ក្រសួងធនធានធម្មជាតិរបស់ប្រទេសចិន នៅថ្ងៃសុក្រ (៣០ សីហា) នេះបានចេញផ្សាយរបាយការណ៍ត្រួតពិនិត្យដំបូងរបស់ខ្លួនអំពីដែនទឹកជម្លោះ សាប៊ីណា ស្ហូល (Sabina Shoal) នៅសមុទ្រចិនខាងត្បូង ដែលក្នុងនោះខ្លួនបានចោទប្រកាន់ឆ្មាំល្បាតឆ្នេរហ្វីលីពីន ពីការចោលសំរាម និងជំទាស់ការអះអាងរបស់ហ្វីលីពីន ដែលថាកងកម្លាំងចិន បានបង្កការខូចខាតចំពោះថ្មប៉ប្រះទឹកមួយនេះ។

របាយការណ៍ដែលធ្វើឡើងពីខែឧសភា ដល់ខែកក្កដា នេះបានបញ្ជាក់ថា «ការនិយាយប្រឌិតរបស់ហ្វីលីពីន ពុំមានមូលដ្ឋានវិទ្យាសាស្ត្រ ឬការពិតទេ» ហើយនៅតែបញ្ជាក់ថា «ចិនមានអធិបតេយ្យភាពមិនអាចប្រកែកបាន» លើផ្លូវទឹកដែលមានជម្លោះនោះ។

ឆ្មាំល្បាតឆ្នេរហ្វីលីពីន បានចោទប្រកាន់ចិន ថាបានសាងសង់កោះសិប្បនិមិត្តនៅដែនទឹក សាប៊ីណា ស្ហូល ខណៈចិន និយាយថា «ការបំពានដោយខុសច្បាប់» របស់នាវាចម្បាំងហ្វីលីពីននៅប្រជុំកោះ ស្ព្រាតលី (Spratly) បាន «បំផ្លាញយ៉ាងធ្ងន់ធ្ងរ» ដល់ប្រព័ន្ធអេកូឡូស៊ីថ្មប៉ប្រះទឹកនៅក្នុងតំបន់នេះ។

ហ្វីលីពីន និងចិន បានចោទដាក់គ្នាជុំវិញការប៉ះទង្គិចជាថ្មីនៅក្នុងដែនទឹកជម្លោះសមុទ្រចិនខាងត្បូងកាលពីថ្ងៃអាទិត្យសប្ដាហ៍មុន ជុំវិញបេសកកម្មផ្គត់ផ្គង់របស់ទីក្រុងម៉ានីល ដោយនោះជាការប្រឈមមុខដាក់គ្នាចុងក្រោយបំផុតនៃភាពតានតឹងដែនសមុទ្រ និងផ្លូវអាកាសនៅក្នុងផ្លូវទឹកយុទ្ធសាស្ត្រ៕