ប្រទេសស៊ែប៊ី កាលពីថ្ងៃព្រហស្បតិ៍ បានចុះហត្ថលេខាលើកិច្ចព្រមព្រៀងដ៏សំខាន់មួយ ជាមួយក្រុមហ៊ុន Dassault Aviation AM.PA របស់ប្រទេសបារាំង សម្រាប់ការទិញយន្តហោះចម្បាំង Rafale ថ្មីចំនួន១២គ្រឿង ក្នុងតម្លៃ ២,៧ ពាន់លានអឺរ៉ូ ឬ ២,៩៩ ពាន់លានដុល្លារ។

ប្រធានាធិបតីប្រទេសស៊ែប៊ី លោក Aleksandar Vucic បាននិយាយក្នុងសន្និសីទសារព័ត៌មានថា កិច្ចព្រមព្រៀង ដែលត្រូវបានចុះហត្ថលេខាដោយរដ្ឋមន្ត្រីក្រសួងការពារជាតិរបស់ប្រទេសស៊ែប៊ី លោក ប្រាទីសស្លាវ ហ្គាស៊ីក(Bratislav Gasic) និងនាយកប្រតិបត្តិក្រុមហ៊ុន Dassault Aviation លោក Eric Trappier ក៏រួមបញ្ចូលនូវកញ្ចប់ដឹកជញ្ជូនទាំងស្រុង គ្រឿងបន្លាស់ម៉ាស៊ីន និងគ្រឿងបន្លាស់ជាច្រើនទៀត ផងដែរ ។

លោក Vucic និយាយថា យន្តហោះប្រភេទថ្មីរាប់សិបគ្រឿង នឹងត្រូវគ្រប់គ្រងដោយប្រទេសស៊ែប៊ី ដែលនេះ នឹងរួមចំណែកដល់ការកើនឡើងគួរឱ្យកត់សម្គាល់នៃសមត្ថភាពប្រតិបត្តិការរបស់កងទ័ពយើង។

ការទិញនេះ ធ្វើឡើងក្នុងអំឡុងដំណើរទស្សនកិច្ចរបស់ប្រធានាធិបតីបារាំង លោក Emmanuel Macron ទៅកាន់ទីក្រុង Belgrade ដែលបង្ហាញសញ្ញាពីការផ្លាស់ប្តូរដ៏សំខាន់ នៅក្នុងជំហរសន្តិសុខ និងនយោបាយរបស់ប្រទេសស៊ែប៊ី ដោយងាកចេញពីប្រទេសរុស្ស៊ី ជាសម្ព័ន្ធមិត្តប្រពៃណី និងជាអ្នកផ្គត់ផ្គង់អាវុធរបស់ខ្លួន។

លោក Macron និយាយថា អឺរ៉ុប ត្រូវការឲ្យប្រទេសស៊ែប៊ី រឹងមាំនិងមានលទ្ធិប្រជាធិបតេយ្យ ខណៈទីក្រុង Belgrade ត្រូវការសហភាពអឺរ៉ុបមានអធិបតេយ្យភាព និងរឹងមាំ។

លោកនិយាយថា ជម្រើសនេះរួមចំណែកដល់ស្វ័យភាពជាយុទ្ធសាស្រ្តរបស់យើង និងធ្វើឲ្យវារឹងមាំ។