​បាល់ទាត់៖ ​ក្រុម​ញញួរ​ធំ West Ham ទំនងជា​នឹងដាក់​កីឡាករ​ចំនូល​ថ្មី​ទាំង ៤​រូប​ដែល​ទិញ​បាន​នៅ​ពេល​ទីផ្សារ​ដោះដូរ​កីឡាករ​បើកចំហ​នា​ពេល​កន្លងមក ​ឱ្យចូល​លេង​ជា​លើកដំបូង​រាត្រី​នេះ​ពេល​ជួប​ជាមួយ Dinamo Zagreb នៅ​ក្របខណ្ឌ UEFA Europa League​។

​​ខ្សែការពារ​ទិញ​ពី Chelsea, Kurt Zouma រួមជាមួយ Nikola Vlasic, Alphonse Areola និង Alex Kral អាច​ស្ថិតក្នុង​បញ្ជី ១១នាក់​ដំបូង​របស់ West Ham រាត្រី​នេះ នេះ​បើតាម​ការលើកឡើង​រប​ស់​អ្នកចាត់ការ​លោក David Moyes​។ ​West Ham មកទល់ពេលនេះ​មិនទាន់​ចាញ់​នៅឡើយ​រដូវ​កាល​នេះ​នៅ​ក្របខណ្ឌ English Premier League បន្ទាប់ពី​ចាប់ផ្តើម ៤ប្រកួត​ឈ្នះ២ និង​ស្មើ២​។ ​West Ham នឹងមាន​អ្នកគាំទ្រ​ប្រមាណ ២០០០នាក់​ទៅ​ទស្សនា​ផ្ទាល់​នៅ​កីឡដ្ឋាន Stadion Maksimir របស់ Dinamo Zagreb នៃ​ប្រទេស​ក្រូ​អាស៊ី​។

​​West Ham ឆ្លង​មកដល់​វគ្គ​វិលជុំ​ក្នុង​ពូ​ល​នេះ​ដោយ​ស្វ័យប្រវត្តិ​មិនបាច់​លេង​វគ្គ Play-Off ឡើយ​ក្រោយ​បញ្ចប់​នៅចំណាត់ថ្នាក់​លេខ ៦ រដូវ​កាល​មុន​។ ​ក្រុម​របស់លោក David Moyes ក៏មាន​បញ្ហា​របួស​កីឡាករ​បន្តិចបន្តួច​ដែរ តែ​ខ្សែប្រយុទ្ធ Michail Antonio ដែល​ត្រូវបាន​បណ្តេញចេញ​ចុង​សប្តាហ៍​កន្លងទៅ​ពេល​លេង​ទល់នឹង Southampton នោះ​នឹង​នៅតែ​ជា​ជម្រើស​ដំបូង​ដដែល​សំរាប់ West Ham៕

​អត្ថបទ​៖​នាង សុភា​វុ​ធ