ក្រុងវ៉ាស៊ីនតោន កាលពីថ្ងៃព្រហស្បតិ៍ (ទី២៩ ខែសីហា) បានជំរុញឲ្យប្រទេសហុងឌុយរ៉ាសពិចារណាឡើងវិញនូវចេតនារបស់ខ្លួន ក្នុងការចាកចេញពីសន្ធិសញ្ញាបត្យាប័នដែលមានជាយូរមកហើយ ខណៈដែលប្រធានាធិបតីហុងឌុយរ៉ាស លោកស្រី Xiomara Castro បានព្រមានអំពីផែនការប្រឆាំងនឹងរដ្ឋាភិបាលឆ្វេងនិយមរបស់លោកស្រីចំពេលមានជម្លោះការទូតថ្មី រវាងប្រទេសទាំង២។

បន្ទាប់ពីឯកអគ្គរដ្ឋទូតសហរដ្ឋអាមេរិក បានសម្តែងការព្រួយបារម្ភ ចំពោះកិច្ចប្រជុំ រវាងមន្ត្រីការពារជាតិហុងឌុយរ៉ាស និងវេណេស៊ុយអេឡា លោកស្រី Castro ដែលបានបញ្ជាឲ្យរដ្ឋាភិបាលរបស់លោកស្រីដកខ្លួនចេញពីសន្ធិសញ្ញា បានលើកឡើងថា សន្ធិសញ្ញានេះកំពុងត្រូវបានប្រើប្រាស់ ដើម្បីធ្វើអន្តរាគមន៍ក្នុងកិច្ចការផ្ទៃក្នុងរបស់ប្រទេសដទៃ។

លោក Castro បាននិយាយថា៖ «ផែនការមួយកំពុងត្រូវបានបង្កើតឡើង ដើម្បីប្រឆាំងនឹងរដ្ឋាភិបាលរបស់ខ្ញុំ ហើយវាជារឿងសំខាន់ដែលប្រជាជនត្រូវដឹងពីរឿងនេះ»។ លោកស្រីបានបន្ថែមថា៖ «ខ្ញុំនឹងមិនអនុញ្ញាតឲ្យឧបករណ៍ធ្វើបត្យាប័នត្រូវបានប្រើប្រាស់ ដើម្បីបំភិតបំភ័យ ឬបង្ខូចកេរ្តិ៍ឈ្មោះកងកម្លាំងប្រដាប់អាវុធហុងឌុយរ៉ាសនោះឡើយ។ យើងការពារកងកម្លាំងប្រដាប់អាវុធរបស់យើង មិនមែនការធ្វើរដ្ឋប្រហារនោះទេ»។

បើយោងតាមអ្នកនាំពាក្យក្រសួងការបរទេសសហរដ្ឋអាមេរិក ដែលរៀបរាប់ប្រវត្តិសន្ធិសញ្ញាបត្យាប័ន បានប្រាប់ឲ្យដឹងថា សន្ធិសញ្ញានេះនៅតែមានជាធរមាន។ មន្ត្រីរូបនេះបាននិយាយការពារកិច្ចព្រមព្រៀងធ្វើបត្យាប័ននេះថា ជាផលប្រយោជន៍ដល់គ្នាទៅវិញទៅមក សម្រាប់ប្រទេសទាំង២។

គួរបញ្ជាក់ថា សន្ធិសញ្ញាបត្យាប័នដែលបានមានរយៈពេលជាង ១សតវត្សរ៍មកហើយ បានជួយសម្រួលដល់ការធ្វើបត្យាប័នជនជាតិហុងឌុយរ៉ាសដែលមានឋានៈខ្ពស់ៗទៅកាន់សហរដ្ឋអាមេរិក ក្នុងនោះរួមទាំងអ្នកកាន់តំណែងមុនរបស់លោកស្រី Castro ផងដែរ គឺអតីតប្រធានាធិបតី លោក Juan Orlando Hernandez៕