វេជ្ជបណ្ឌិតនៅទីក្រុង Kinshasa រដ្ឋធានីនៃសាធារណរដ្ឋប្រជាធិបតេយ្យកុងហ្គោ បាន​ព្យាបាល​អ្នក​ជំងឺ​អុតស្វា(mpox)ជាច្រើននាក់ កាលពីថ្ងៃសុក្រ ខណៈមន្ទីរពេទ្យ បានបន្តប្រយុទ្ធ​ប្រឆាំង​ទៅ​នឹង​ការ​កើនឡើងនៃករណីជំងឺនេះ។ បុគ្គលិកពេទ្យ មានការប្រុងប្រយ័ត្នខ្ពស់ ចាប់តាំងពី​អង្គការ​សុខភាព​ពិភពលោក បានប្រកាសថា ជំងឺអុតស្វា(mpox) ជាគ្រាអាសន្នសុខ​ភាព​សាធារណៈ​សកល កាលពីដើមខែនេះ។

លោកវេជ្ជបណ្ឌិត Jose Pululu ប្រធានមជ្ឈមណ្ឌលជំងឺអុតស្វា(Mpox) បានរៀប​រាប់​លម្អិត​អំពី​វិធី​សាស្រ្តរបស់ពួកគេក្នុងការគ្រប់គ្រងករណីធ្ងន់ធ្ងរ ហើយលោក បានបញ្ជាក់ពីរបៀប​ដែល​ជំងឺ​អុសស្វា(mpox) អាចនាំឱ្យមានផលវិបាកធ្ងន់ធ្ងរ។

អង្គការសុខភាពពិភពលោក (WHO) បានប្រកាសកាលពីថ្ងៃសុក្រថា វ៉ាក់សាំង​ជំងឺ​អុតស្វា​(mpox) ត្រូវបានគេរំពឹងថានឹងទៅដល់សាធារណរដ្ឋប្រជាធិបតេយ្យកុងហ្គោ ក្នុងប៉ុន្មាន​ថ្ងៃ​ខាង​មុខ​នេះ ដើម្បីប្រយុទ្ធប្រឆាំងទៅនឹងវីរុសបំប្លែងខ្លួនថ្មី។ យោងតាមមន្ត្រីអង្គការសុខភាពពិភពលោក(WHO) លោក ធីម ង្វៀន(Tim Nguyen) បានឱ្យដឹងថា វ៉ាក់សាំងប្រហែល ២៣០.០០០ដូស ត្រៀមរួចរាល់សម្រាប់ចែកចាយ ដែលបានផ្តល់ឲ្យដោយគណៈកម្មការអឺរ៉ុប និងក្រុមហ៊ុនផលិតវ៉ាក់សាំងរបស់ប្រទេសដាណឺម៉ាក Bavarian Nordic ។ ទោះបីជាមានការជំរុញឱ្យចាក់វ៉ាក់សាំងក៏ដោយ ក៏អ្នកជំងឺមួយចំនួន មានការស្ទាក់ស្ទើរក្នុងការចាក់វ៉ាក់សាំង។

អង្គការសុខភាពពិភពលោក បានរាយការណ៍ករណីសង្ស័យជាង ១៨.០០០ករណី និងអ្នកស្លាប់ចំនួន៦២៩នាក់ នៅក្នុងប្រទេសកុងហ្គោ ក្នុងឆ្នាំនេះ ដោយករណីជាង១៥០ករណីទៀត ត្រូវបានបញ្ជាក់ នៅក្នុងប្រទេសប៊ូរុនឌី។

ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយកាលពីថ្ងៃសុក្រ ថាវ៉ាក់សាំងជំងឺអុតស្វា(mpox) ត្រូវបានកំណត់ថានឹងទៅដល់សាធារណរដ្ឋប្រជាធិបតេយ្យកុងហ្គោនៅប៉ុន្មានថ្ងៃខាងមុខនេះ ដើម្បីប្រយុទ្ធប្រឆាំងនឹងវីរុសបំប្លែងខ្លួនថ្មី។