អាជ្ញាធរក្នុងតំបន់បាននិយាយថា ការវាយប្រហារដោយគ្រាប់បែកស៊ីបគោលដៅរបស់រុស្ស៊ីទៅលើទីក្រុង Kharkiv ភាគឦសានប្រទេសអ៊ុយក្រែន បានធ្លាក់លើអគារលំនៅឋាន និងសួនកុមារ មួយកន្លែងកាលពីថ្ងៃសុក្រ ដោយបានសម្លាប់មនុស្ស៧នាក់ និងយ៉ាងហោចណាស់៧៧នាក់ រងរបួស។

ប្រធានាធិបតីអ៊ុយក្រែនលោក Volodymyr Zelenskyy បាននិយាយថា ក្មេងស្រីអាយុ១៤ឆ្នាំម្នាក់ស្ថិតក្នុងចំណោមអ្នកស្លាប់។ អភិបាលក្រុង លោក Ihor Terekhov បាននិយាយនៅលើបណ្តាញ Telegram ថា កុមារម្នាក់ ស្លាប់នៅក្នុងសួនកុមារ។

អភិបាលក្រុង និយាយថា ប្លុកផ្ទះល្វែងកម្ពស់១២ជាន់ បានឆាបឆេះបណ្តាលមកពីការវាយប្រហារ ហើយចំនួនអ្នកស្លាប់ដោយសារការវាយប្រហារ បានកើនឡើងដល់៧នាក់ នៅពេលដែលសាកសពស្ត្រីម្នាក់ ត្រូវបានទាញយកចេញពីគំនរបាក់បែក។

អភិបាលតំបន់ លោក Oleh Syniehubov បាននិយាយថា អ្នករងរបួសប្រហែល២០នាក់ ស្ថិតក្នុងស្ថានភាពធ្ងន់ធ្ងរ។ នៅខាងចុងនៃប្លុកផ្ទះល្វែងនៅតែមានផ្សែងខ្មៅហុយចេញ ដោយជាន់ខាងលើនៅមានអណ្តាតភ្លើង។ រថយន្តជាច្រើនគ្រឿងដែលចតនៅខាងក្រៅ ត្រូវបានបំផ្លាញដោយអគ្គិភ័យ។

អង្គភាពសេវាសង្គ្រោះបន្ទាន់ និងអ្នកស្ម័គ្រចិត្តជួយសង្គ្រោះ បានប្រញាប់ប្រញាល់ដឹកអ្នករស់រានមានជីវិតចេញពីអាគារ។ 

អាជ្ញាធរអ៊ុយក្រែន បាននិយាយថា ការវាយប្រហារកាលពីថ្ងៃសុក្រ ពាក់ព័ន្ធនឹងគ្រាប់បែកស៊ីបគោលដៅពីលើអាកាសចំនួន៥គ្រាប់ ដែលបាញ់ចេញពីយន្តហោះនៅក្នុងតំបន់ Belgorod របស់រុស្ស៊ី ដែលត្រូវបានគេស្គាល់ថា «គ្រាប់បែកសំកាំងរេរកគោលដៅ» ដែលបំពាក់ដោយប្រព័ន្ធស្វែងរក នាំពួកវាទៅកាន់គោលដៅ នៃការវាយប្រហារ។