បេក្ខជនប្រធានាធិបតីមកពីគណបក្សសាធារណរដ្ឋ លោក Donald Trump បានហៅអនុប្រធានាធិបតីសហរដ្ឋអាមេរិក និងជាគូប្រជែងបច្ចុប្បន្ន លោកស្រី Kamala Harris ថាជា «មនុស្សគ្មានសមត្ថភាពគ្រប់គ្រាន់» កាលពីថ្ងៃសុក្រ។

លោក Trump បានចូលរួមក្នុងកិច្ចប្រជុំកំពូលប្រចាំឆ្នាំនៃអង្គការមិនរកប្រាក់ចំណេញផ្នែកអភិរក្ស «Moms for Liberty» នៅទីក្រុង Washington, D.C. ។

កាលពីព្រឹកថ្ងៃសុក្រ លោកបានប្រមូលផ្តុំយុទ្ធនាការនៅទីក្រុង Johnstown រដ្ឋ Pennsylvania ជាលើកដំបូង ចាប់តាំងពីការប៉ុនប៉ងធ្វើឃាតលោកនៅទីក្រុង បាត់ល័រ(Butler) កាលពីថ្ងៃទី១៣ ខែកក្កដា។

ការស្ទង់មតិបង្ហាញថា លោក Trump បានបាត់បង់មូលដ្ឋានជាមួយនឹងអ្នកបោះឆ្នោតជាស្ត្រី ចាប់តាំងពីអនុប្រធានាធិបតី លោកស្រី Kamala Harris បានក្លាយជាបេក្ខជនគណបក្សប្រជាធិបតេយ្យ នៅក្នុងការបោះឆ្នោតនៅថ្ងៃទី៥ ខែវិច្ឆិកា ខាងមុខ។ 

លោកស្រី Harris បាននាំមុខ លោក Trump ដោយ ៤៩% ទល់នឹង ៣៦% ក្នុងចំណោមអ្នកបោះឆ្នោតជាស្ត្រី នៅក្នុងការស្ទង់មតិរបស់សារព័ត៌មាន Reuters / Ipsos ដែលបានចេញផ្សាយកាលពីថ្ងៃព្រហស្បតិ៍ ទី២៩ ខែសីហា។