ប្រព័ន្ធផ្សព្វផ្សាយរដ្ឋបានដកស្រង់សម្តីអនុរដ្ឋមន្ត្រីការបរទេស លោក ហ្សឺហ្គេ រីយ៉ាកូស (Sergei Ryabkov) ដោយបាននិយាយកាលពីថ្ងៃអាទិត្យថា ប្រទេសរុស្ស៊ីនឹងផ្លាស់ប្តូរគោលការណ៍នុយក្លេអ៊ែរ (Nuclear doctrine)របស់ខ្លួនស្តីពីការប្រើប្រាស់អាវុធនុយក្លេអ៊ែរជាការឆ្លើយតបទៅនឹងអ្វីដែលខ្លួនចាត់ទុកថាជាការកើនឡើងតួនាទីរបស់លោកខាងលិចនៅក្នុងសង្គ្រាមនៅអ៊ុយក្រែន។

គោលការណ៍នុយក្លេអ៊ែរមានស្រាប់ ដែលមានចែងក្នុងក្រឹត្យមួយដោយលោកប្រធានាធិបតី Vladimir Putin កាលពីឆ្នាំ ២០២០ និយាយថា រុស្ស៊ីអាចប្រើប្រាស់អាវុធនុយក្លេអ៊ែរក្នុងករណីមានការវាយប្រហារនុយក្លេអ៊ែរមុនពីសត្រូវ ឬការវាយប្រហារណាមួយ ដែលចាត់ទុកថាជាការគំរាមកំហែងដល់សុវត្ថិភាពរដ្ឋរបស់ខ្លួន។

មួយចំនួនក្នុងចំណោមក្រុមអ្នកវិភាគយោធារបស់រុស្ស៊ី បានជំរុញឱ្យលោក Putin បន្ថយកម្រិតនៃការប្រើប្រាស់នុយក្លេអ៊ែរដើម្បីកាត់បន្ថយភាពតានតឹងជាមួយសត្រូវរបស់រុស្ស៊ីនៅលោកខាងលិច។

មេដឹកនាំកំពូលរបស់រុស្ស៊ីរូបធ្លាប់នេះបាននិយាយកាលពីខែមិថុនាថា គោលការណ៍នុយក្លេអ៊ែរគឺជា ឧបករណ៍រស់ ដែលអាចផ្លាស់ប្តូរអាស្រ័យលើព្រឹត្តិការណ៍ពិភពលោក។ ការអត្ថាធិប្បាយរបស់ លោក រីយ៉ាកូស កាលពីថ្ងៃអាទិត្យ គឺជាសេចក្តីថ្លែងការណ៍ច្បាស់លាស់បំផុតដែលថាការផ្លាស់ប្តូរពិតជានឹងត្រូវបានធ្វើឡើង។    

ទីក្រុងមូស្គូបានចោទប្រកាន់លោកខាងលិចថាបានប្រើប្រាស់អ៊ុយក្រែនជាកូនអុកដើម្បីធ្វើសង្គ្រាមប្រឆាំងនឹងរុស្ស៊ី ក្នុងគោលបំណងធ្វើឱ្យមានការបរាជ័យជាយុទ្ធសាស្រ្ត លើប្រទេសរុស្ស៊ី និងកាច់បំបាក់ឲ្យមហាអំណាចយោធាមួយនេះចុះខ្សោយ៕