ក្រុមកម្មករ កម្មការិនី រោងចក្រកាត់ដេរនៅរាជធានីភ្នំពេញ បានបង្ហាញអារម្មណ៍សប្បាយរីករាយ ​នៅ​ពេលទទួលដំណឹងជាវិជ្ជមាន ក្នុងកា​រ​ដំឡើង​នូវ​ប្រាក់​ឈ្នួល​អប្បបរ​មា​សម្រាប់ឆ្នាំ​២០២៥​ខាង​មុខ​បន្ថែម​ទៀត ខណៈភាគីសហជីពស្នើសុំដំឡើងចំនួន ១៤ដុល្លារ រីឯភាគីនិយោជក​ព្រម​បន្ថែម​ចំនួន ១ដុល្លារ។

កម្មករ កម្មការនីរោងចក្រកាត់ដេរសម្លៀកបំពាក់ សៅលែន ឬហៅរោងចក្រ ៦ជាន់ ស្ថិត​នៅ​សង្កាត់​ត្រពាំងថ្លឹង ខ័ណ្ឌពោធិ៍សែន នៅព្រឹកថ្ងៃទី២ ខែកញ្ញានេះ បានឲ្យព័ត៌មាន ប៊ីធីវី ដឹងថា រហូត​មកដល់ពេលនេះ ពួកគាត់មានសង្ឃឹម និងជឿជាក់លើការដឹកនាំរបស់រាជរដ្ឋាភិបាលកម្ពុជា ចាប់​តាំងពីការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្ន​ជា​ប្រធាន​ព្រឹទ្ធសភា រហូតបន្តដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីបច្ចុប្បន្ន ដែល​តែង​តែ​គិតគូរ​ក្នុង​ការដំឡើងប្រាក់ឈ្នួលអប្បបរមាជារៀងរាល់ឆ្នាំដល់កម្មករនិយោជិត ទោះបីជាមិន​បាន​ច្រើន​តាម​ការចង់បាន ប៉ុន្តែនៅមានសញ្ញាលេខបូកជានិច្ច។

កម្មករ កម្មការនីរោងចក្រ សង្ឃឹមទៀតថា ការចចារប្រាក់ឈ្នួលសម្រាប់ឆ្នាំ២០២៥ នឹងមាន​ភាព​ល្អ​ប្រសើរ​បន្ថែមទៀត ដោយសារភាពជឿជាក់លើការដឹកនាំរបស់ប្រមុខរាជរដ្ឋាភិបាល ដែល​លោក​តែង​តែយកចិត្តទុកដាក់ និងគិតគូរខ្ពស់​អំពី​សុខ​ទុក្ខ​ការ​រស់​របស់​កម្មករ​និយោជិត​គ្រប់​លំដាប់​ថ្នាក់​។

លោក ឈុន ប៉ែន សហពន្ធ័សហជីពខ្មែរ បានឲ្យដឹងដែរថា ចាប់តាំងពីវិបត្តិកូវីដ១៩ រហូត​មក​ដល់​បច្ចុប្បន្ន​នេះ ស្ថានភាពនៃការរស់នៅ ក៏ដូចជាការបំពេញការងាររបស់កម្មករនិយោជិត គឺ​មាន​ភាព​ល្អ​ប្រសើរ​ច្រើន ដោយមានការងារធ្វើជាប់ជាប្រចាំ និងមានការងារថែមម៉ោងជាដើម ដោយសារ​ការបញ្ជាទិញកើនឡើង។ជាមួយនេះ លោកក៏បានសម្តែងការដឹងគុណ និងអរគុណ​ថ្នាក់​ដឹកនាំ​នៃស្ថាប័នពាក់ព័ន្ធទាំងអស់ ដែលមានទឹកចិត្ត យល់ដល់កម្មករ​តាមរយៈ​ការ​ដំឡើង​ប្រាក់​ឈ្នួល​ជារៀងរាល់ឆ្នាំ ជាក់ស្តែង ទោះបីជួបវិបត្តិសេដ្ឋកិច្ចសាកលដោយសារកូវីដ ក៏ពួក​គាត់​ខិតខំ​បន្ថែម​ប្រាក់ដល់កម្មកររោងចក្រទាំងអស់។

គួររម្លឹកថា ក្នុងកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាផ្នែកវាយនភណ្ឌកាត់ដេរ ផលិត​ស្បែក​ជើង និងផលិតផលធ្វើដំណើរនិងកាបូប កាលពីថ្ងៃទី២៩ សីហា ឆ្នាំ២០២៤កន្លងទៅ ភាគី​សហជីព​តំណាង​កម្មករនិយោជិត បានមូលមតិគ្នាសម្រេច ស្នើសុំដំឡើងចំនួន ១៤ដុល្លារ​បន្ថែម​លើ​ប្រាក់​ឈ្នួល​បច្ចុប្បន្ន ចំនួន ២០៤ ដុល្លារ ខណៈភាគីនិយោជក បានកំណត់ដំឡើងចំនួន ១ដុល្លារ​៕ អត្ថបទ ឈិត បូរ៉ាវី