នាយករដ្ឋមន្ត្រីរបស់ប្រទេសថៃ លោកស្រី ផែថងថាន ស៊ីណាវ៉ាត់ (Paetongtarn Shinawatra) បាននិយាយនៅថ្ងៃចន្ទ (០២ កញ្ញា) នេះថា គណៈរដ្ឋមន្ត្រីថ្មីរបស់ប្រទេសថៃ ត្រូវបានជ្រើសរើសរួចរាល់ ហើយនឹងត្រូវបានដាក់ជូនទៅព្រះមហាក្សត្រសម្រាប់ការរាជានុម័តក្នុងសប្តាហ៍នេះ។

ក្រុមមន្ត្រីនៅក្នុងរដ្ឋាភិបាលចាំផ្ទះរបស់លោកស្រីធ្លាប់បាននិយាយថា រដ្ឋបាលថ្មីគួរតែត្រូវបានបង្កើតឡើងនៅពាក់កណ្តាលខែកញ្ញា។

មន្ត្រីជាន់ខ្ពស់មួយរូបបាននិយាយថា នៅពេលដែលបានរាជានុម័តរួច បណ្ដារដ្ឋមន្ត្រីថ្មីនឹងតម្រូវឱ្យធ្វើសម្បថនៅចំពោះព្រះភ័ក្ត្រព្រះមហាក្សត្រ មុនពេលដែលពួកគេអាចកោះប្រជុំដើម្បីពិភាក្សា និងប្រកាសអំពីសេចក្តីថ្លែងការណ៍គោលនយោបាយនានាបាន។

អ្នកនយោបាយវ័យក្មេង លោកស្រី ផែថងថាន បានឈ្នះការគាំទ្រពីសភាក្លាយជានាយករដ្ឋមន្ត្រីវ័យក្មេងបំផុតរបស់ប្រទេសថៃ កាលពីពាក់កណ្ដាលខែសីហា ត្រឹមតែមួយថ្ងៃប៉ុណ្ណោះបន្ទាប់ពីលោកស្រីទទួលបានបេក្ខភាព ស្របពេលមានការតស៊ូអំណាចមិនឈប់ឈររវាងក្រុមឥស្សរជនក្នុងប្រទេស៕