យោងតាមអនុស្សរណៈរបស់រដ្ឋាភិបាលផ្ទៃក្នុង ដែលមើលឃើញដោយសារព័ត៌មានរ៉យទ័របានបង្ហាញថា កាលពី ៥ឆ្នាំមុន រដ្ឋាភិបាលនៃរដ្ឋ វេស បេនហ្កាល់ (West Bengal) នៅឥណ្ឌា បានសន្យាថានឹងទប់ស្កាត់អំពើហិង្សាលើវេជ្ជបណ្ឌិត ហើយបានសន្យាថាមន្ទីរពេទ្យរដ្ឋនឹងមានឧបករណ៍សន្តិសុខកាន់តែប្រសើរឡើង រួមទាំងមានឆ្មាំល្បាតស្ត្រីដើម្បីគាំទ្រដល់គ្រូពេទ្យស្ត្រី និងការគ្រប់គ្រងលើច្រកចេញចូលមន្ទីរពេទ្យជាដើម។

ប៉ុន្តែយោងតាមប្រភពគ្រូពេទ្យជាច្រើនបានឱ្យដឹងថា វិធានការទាំងនោះពុំត្រូវបានអនុវត្តទេនៅតាមមន្ទីរពេទ្យរដ្ឋ ដែលគ្រូពេទ្យហាត់ការស្រ្តីម្នាក់ត្រូវបានរំលោភសម្លាប់កាលពីថ្ងៃទី០៩ ខែសីហា។

ផ្ទុយទៅវិញ នៅថ្ងៃដែលឈានទៅដល់ហេតុការណ៍មនុស្សឃាត ដែលបង្កឱ្យមានការខឹងសម្បារទូទាំងប្រទេសនិងកូដកម្មពីគ្រូពេទ្យនោះ មានតែឆ្មាំល្បាតប្រុសពីរនាក់ប៉ុណ្ណោះដែលនៅមើលការខុសត្រូវមន្ទីរពេទ្យមួយនោះ។ ប្រភពពីគ្រូពេទ្យហាត់ការបាននិយាយថា កាមេរ៉ាសុវត្ថិភាពនៅមន្ទីរពេទ្យមានមិនគ្រប់គ្រាន់ ទ្វារបន្ទប់សម្រាកមិនមានសោរត្រឹមត្រូវ ហើយបរិក្ខារសុវត្ថិភាពជាច្រើនមិនដំណើរការ។

ជាមួយគ្នានេះ គ្រូពេទ្យជាច្រើនបានត្អូញត្អែរពីលក្ខខណ្ឌការងារមិនល្អ រួមទាំងសកម្មភាពកម្រោលពីក្រុមគ្រួសារអ្នកជំងឺ និងអ្នកខ្លះត្រូវសម្រាកនៅលើកៅអីក្នុងច្រករបៀងមន្ទីរពេទ្យ ដោយសារពុំមានកន្លែងសម្រាកគ្រប់គ្រាន់។ ការរំលោភសម្លាប់លើគ្រូពេទ្យនៅទីក្រុង កុលកាតា (Kolkata) នេះ បានឆ្លុះបញ្ជាំងពីការរំលោភបូកកាលឆ្នាំ២០១២ លើបុគ្គលិកថែទាំសុខភាពម្នាក់នៅទីក្រុង ញូវដេលី (Delhi) ដែលធ្វើអោយពលរដ្ឋឥណ្ឌាខឹងសម្បារ និងបង្កឱ្យមានការតវ៉ាដូចគ្នានេះ៕