អធិការបតីអាល្លឺម៉ង់លោក អូឡាហ្វ សូល ( Olaf Scholz) បានអំពាវនាវឲ្យមានបទឈប់បាញ់ នៅក្នុងតំបន់ហ្កាហ្សា ជាមធ្យោបាយតែមួយគត់ ដើម្បីដោះលែងចំណាប់ថ្នូរទាំងអស់ ដែលត្រូវបានឃុំខ្លួនដោយចលនាបដិវត្តន៍ប៉ាឡេស្ទីនហាម៉ាស។

លោក បានសរសេរនៅលើទំព័រ X របស់ខ្លួនថា៖«ព័ត៌មានអំពីចំណាប់ថ្នូរចំនួន ៦នាក់ ដែលត្រូវបានគេរកឃើញថា បានស្លាប់នៅក្នុងតំបន់ហ្កាហ្សាស្ទ្រីប គឺពោរពេញទៅដោយភាពសោកសៅ និងកំហឹង។ ភេរវករ ហាម៉ាស គឺជាអ្នកទទួលខុសត្រូវចំពោះការស្លាប់របស់ស្ត្រី និងបុរសទាំងនេះ ដែលម្នាក់ក្នុងចំណោមនោះ ត្រូវបានដាក់ក្នុងជួរជាមួយប្រទេសអាល្លឺម៉ង់»។ «ក្នុងពេលជាមួយគ្នានេះ វាច្បាស់ណាស់ថា បទឈប់បាញ់ ដែលត្រួសត្រាយផ្លូវសម្រាប់ការដោះលែងចំណាប់ខ្មាំងទាំងអស់ ដែលក្រុមហាម៉ាសបានចាប់ ត្រូវតែជាអាទិភាពចម្បង នៅពេលនេះ»។

យោធាអ៊ីស្រាអែល បានរកឃើញសាកសពចំណាប់ថ្នូរជនជាតិអ៊ីស្រាអែលចំនួន ៦នាក់ នៅក្នុងផ្លូវរូងក្រោមដីក្បែរទីក្រុងរ៉ាហ្វានៃតំបន់ហ្កាហ្សាស្ទ្រីបភាគខាងត្បូង កាលពីថ្ងៃទី ៣១ ខែសីហា។ លោក Alexander Lobanov ដែលជាពលរដ្ឋអ៊ីស្រាអែល និងរុស្សី ស្ថិតក្នុងចំណោមពួកគេ។ អ្នកនាំពាក្យកងកម្លាំងការពារអ៊ីស្រាអែល (IDF) លោក Daniel Hagari បាននិយាយ កាលពីថ្ងៃទី ០១ ខែកញ្ញាថា ការពិនិត្យកោសល្យវិច្ច័យបង្ហាញថា អ្នកទាំង ៦នាក់ ត្រូវបានបាញ់សម្លាប់ភ្លាមៗ មុនពេលដែលទាហាន      អ៊ីស្រាអែល ទៅដល់តំបន់នោះ។