រដ្ឋអាជ្ញារបស់ប្រទេសវេណេស៊ុយអេឡា កាលពីថ្ងៃចន្ទទី២ ខែកញ្ញា បានស្នើសុំដីកាចាប់ខ្លួនមេដឹកនាំគណបក្សប្រឆាំង លោក Edmundo Gonzalez បន្ទាប់ពី លោក មិនបានឆ្លើយតបទៅនឹងការកោះហៅចំនួនបីលើក ដើម្បីផ្តល់សក្ខីកម្មអំពីគេហទំព័ររបស់គណបក្សប្រឆាំង ដែលបានផ្សព្វផ្សាយលទ្ធផលលម្អិតនៃការបោះឆ្នោតប្រធានាធិបតី ដែលមានភាពចម្រូងចម្រាស់របស់ប្រទេស។

គេហទំព័រនេះ កំពុងត្រូវបានស៊ើបអង្កេតពីបទ «ដណ្តើមយកតួនាទី» របស់អាជ្ញាធររៀបចំការបោះឆ្នោត ដែលនិយាយថា ប្រធានាធិបតី លោក Nicolas Maduro បានទទួលជ័យជម្នះក្នុងការប្រកួតប្រជែងការបោះឆ្នោត កាលពីថ្ងៃទី២៨ ខែកក្កដា ប៉ុន្តែពុំបានផ្សព្វផ្សាយលទ្ធផលលម្អិត នោះទេ។

អាជ្ញាធររៀបចំការបោះឆ្នោតជាតិ របស់ប្រទេសវេណេស៊ុយអេឡា និងតុលាការកំពូលរបស់ខ្លួន បាននិយាយថា លោក Maduro គឺជាអ្នកឈ្នះក្នុងការបោះឆ្នោតដោយទទួលបានសំឡេងជាងពាក់កណ្តាល ប៉ុន្តែចំនួនសរុប ដែលត្រូវបានបង្ហោះដោយគណបក្សប្រឆាំង បង្ហាញពីជ័យជម្នះយ៉ាងលើសលប់សម្រាប់ លោក Gonzalez ។

គណបក្សប្រឆាំង បណ្តាប្រទេសលោកខាងលិចមួយចំនួន និងស្ថាប័នអន្តរជាតិ ព្រមទាំងក្រុមអ្នកជំនាញរបស់អង្គការសហប្រជាជាតិ បាននិយាយថា ការបោះឆ្នោតពុំមានតម្លាភាព និងទាមទារឱ្យមានការចេញផ្សាយលទ្ធផលសរុបពេញលេញ ដោយមួយចំនួននិយាយថាមានការក្លែងបន្លំ។

មន្ត្រីគណបក្សកាន់អំណាច រួមទាំងលោក Maduro បានចោទប្រកាន់ក្រុមប្រឆាំងថា បានបង្កអំពើហិង្សា ហើយរដ្ឋអាជ្ញា លោក Tarek Saab បានបើកការស៊ើបអង្កេតឧក្រិដ្ឋកម្មទៅលើមេដឹកនាំបក្សប្រឆាំងលោកស្រី Maria Corina Machado លោកGonzalez និងគេហទំព័រ ដែលគណបក្សប្រឆាំងបានបង្ហោះច្បាប់ចម្លងនៃចំនួនសន្លឹកឆ្នោតសរុប។

ការតវ៉ា ចាប់តាំងពីការបោះឆ្នោតមក បានបណ្តាលឱ្យមនុស្សយ៉ាងហោចណាស់ ២៧នាក់ស្លាប់។