​ឥណ្ឌា៖ សមាជិក​យុវជន​នៃ​គណបក្ស ​Congress ជា​បក្ស​ប្រឆាំង​ធំ​របស់​ប្រទេស​ឥណ្ឌា​បាន​ប៉ះ​ទង្គិច​ជាមួយ​នគរបាល ​អំឡុង​ការ​តវ៉ា​តាម​ដង​ផ្លូវ​កាលពី​ថ្ងៃ​សុក្រ​ដែល​ទាមទារ​ឱ្យ​មាន​ការ​ងារ​ធ្វើ ខណៈ​សេដ្ឋកិច្ច​របស់​ប្រទេស​ងើបឡើង​វិញ​ពី​ការ​បិទ​ខ្ទប់​ ដោយសារ​វីរុស​ឆ្លង​កាល​ពី​ឆ្នាំមុនបណ្ដាល​ឱ្យ​គ្មាន​ការងារ​ធ្វើ​ច្រើន​។

ពួកគេ​បាន​ជំរុញ​ប្រជាជន​កុំ​ឱ្យ​ប្រារព្ធ​ខួប​កំណើត​គម្រប់ ​៧១​ឆ្នាំ​របស់​នាយក​រដ្ឋមន្ត្រី លោក Narendra Modi កាលពី​ថ្ងៃ​សុក្រ។ អ្នកគាំទ្រ​គណបក្ស Congress ប្រមាណ ១៥០​នាក់​បាន​កាន់​​បដា​ធំ​មួយ​ដើរ​ឆ្លងកាត់​តាម​ដង​ផ្លូវ​នៃ​ទីក្រុង​ញូ​វ​ឌេ​លី​។​ ​ក្រុម​អ្នក​តវ៉ា​មួយ​ចំនួន​បាន​ព្យា​យាម​លោតរំលង​រនាំង​ឃាំង​របស់​នគរបាល ដែល​បាន​ដាក់​រាំង​ការ​ដើរ​ក្បួន​ទៅកាន់​ការិយា​ល័យ​រដ្ឋាភិបាល​។ នគរបាល​បាន​ចាប់ខ្លួន​ក្រុម​បាតុករ​មួយ​ចំនួន​ ហើយ​យក​ពួកគេ​ទៅ​ដាក់​ក្នុង​រថយន្ត​ក្រុង​។

លោក Harish Pawar ប្រធាន​ក្រុម​យុវជន​របស់​គណបក្ស Congress បាន​និយាយ​ថា លោក Modi គួរតែ​សុំ​ឱ្យ​ប្រជាជន​កុំ​ប្រារព្ធ​ពិធី​ខួបកំណើត​របស់​លោក​ ដោយ​សារ​តែការបំផ្លាញ​ពី​វីរុស COVID-19 និង​ភាព​អត់​ការងារ​ធ្វើ​កើន​ឡើង​។ រដ្ឋមន្ត្រី​ក្រសួង​សុខាភិបា​ល​ឥណ្ឌា ​លោក Mansukh Mandaviya បាន​និយាយ​ថា ​ប្រជាជន ១០​លាន​នាក់​ទទួល​បាន​ការ​ចាក់​វ៉ាក់សាំង​ការពារ​វីរុស COVID-19 កាលពី​ថ្ងៃ​សុក្រ ដែល​ជា​ផ្នែក​មួយ​នៃ​ការ​ប្រារព្ធ​ពិធី​ខួបកំណើត​របស់​លោក ​Modi​៕

អត្ថបទ៖ ប៊ុនថន