នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃចន្ទ (០២ កញ្ញា) បានច្រានចោលការអំពាវនាវឱ្យបន្ធូរបន្ថយការទាមទាររបស់ខ្លួនក្នុងការទុកកងទ័ពនៅច្រករបៀងតំបន់ព្រំដែនភាគខាងត្បូងហ្កាហ្សាដោះដូរយកកិច្ចព្រមព្រៀងបទឈប់បាញ់ ដោយនិយាយថាវាមានសារៈសំខាន់សម្រាប់អ៊ីស្រាអែលក្នុងការគ្រប់គ្រងខ្សែបន្ទាត់ដ៏សំខាន់មួយនោះរបស់ក្រុមហាម៉ាស។

បញ្ហានៃច្រករបៀង ហ្វីឡាឌែលហ្វៀ (Philadelphia) នៅជាយភាគខាងត្បូងនៃតំបន់ហ្កាហ្សាស្រ្ទីប ជាប់ព្រំដែនអេហ្ស៊ីប គឺជាចំណុចជាប់គាំងដ៏សំខាន់ក្នុងកិច្ចខិតខំប្រឹងប្រែងដើម្បីទទួលបានកិច្ចព្រមព្រៀងបញ្ឈប់ការប្រយុទ្ធគ្នានៅតំបន់ហ្កាហ្សា និងប្រគល់ចំណាប់ថ្នូរអ៊ីស្រាអែលដែលកាន់កាប់ដោយក្រុមហាម៉ាសមកវិញ។

លោក Netanyahu បានប្រាប់សន្និសីទសារព័ត៌មានមួយថា «ក្រុមហាម៉ាសត្រូវការច្រករបៀង Philadelphia ដើម្បីប្រតិបត្តិការ ដោយវាជាហេតុផលដែលយើងត្រូវតែគ្រប់គ្រងទីនោះ។ ប្រសិនបើអ៊ីស្រាអែលដកខ្លួនចេញពីច្រកនោះ សម្ពាធអន្តរជាតិនឹងធ្វើឱ្យកងកម្លាំងពិបាកត្រឡប់ទៅវិញ»។

ក្រុមហាម៉ាស បានច្រានចោលវត្តមានយោធាណាមួយរបស់អ៊ីស្រាអែល ខណៈលោក Netanyahu បានទទូចថាអ៊ីស្រាអែលនឹងមិនបោះបង់ចោលច្រករបៀងនេះឡើយ ជាទីដែលកងទ័ពអ៊ីស្រាអែលបានរកឃើញផ្លូវរូងក្រោមដីរាប់សិបទីតាំង ដែលត្រូវបានប្រើប្រាស់ដើម្បីរត់ពន្ធអាវុធ និងគ្រាប់រំសេវចូលទៅក្នុងហ្កាហ្សា។

ជំហររបស់លោក Netanyahu លើការចរចាដែលបានបន្តអស់ជាច្រើនសប្តាហ៍ដោយពុំមានលទ្ធផលនោះ បានធ្វើឱ្យសម្ព័ន្ធមិត្តខកចិត្ត រួមទាំងសហរដ្ឋអាមេរិក និងបានពង្រីកការខ្វែងគំនិតកាន់តែធំជាមួយរដ្ឋមន្ត្រីការពារជាតិរបស់ខ្លួន គឺលោក យ៉ាវ ហ្កាឡាន់ (Yoav Gallant)៕