អង្គការទេសន្តរប្រវេសន៍អន្តរជាតិ(IOM) កាលពីថ្ងៃចន្ទ បាននិយាយថា ជនអន្តោប្រវេសន៍ចំនួន៩៧៩នាក់ ត្រូវបានស្ទាក់ចាប់ ហើយបានបញ្ចូនត្រឡប់ទៅឆ្នេរសមុទ្រប្រទេសលីប៊ី វិញ កាលពីសប្តាហ៍មុន។ 

អង្គការទេសន្តរប្រវេសន៍អន្តរជាតិ(IOM) បាននិយាយនៅក្នុងសេចក្តីថ្លែងការណ៍ថា «ចាប់ពីថ្ងៃទី២៥ ដល់ថ្ងៃទី៣១ ខែសីហា ឆ្នាំ២០២៤ ជនអន្តោប្រវេសន៍ចំនួន៩៧៩នាក់ ត្រូវបានស្ទាក់ចាប់ ហើយបញ្ជូនត្រឡប់ទៅប្រទេសលីប៊ី។

អង្គការ IOM និយាយថា ជនអន្តោប្រវេសន៍រួមមានស្ត្រី៧៤នាក់ និងកុមារ៣៣នាក់ ហើយ សាកសពជនអន្តោប្រវេសន៍៧នាក់ ត្រូវបានរកឃើញ ខណៈ៨នាក់ផ្សេងទៀតបានបាត់ខ្លួន នៅឆ្នេរសមុទ្រប្រទេសលីប៊ី។ 

របាយការណ៍បាននិយាយថា ជនអន្តោប្រវេសន៍សរុបចំនួន ១៥.១១៧នាក់ ត្រូវបានស្ទាក់ចាប់នៅឆ្នាំនេះ ខណៈមនុស្ស៤៣៤នាក់បានស្លាប់ និង៦១១នាក់ ផ្សេងទៀតបានបាត់ខ្លួននៅសមុទ្រ។

យោងតាមមន្ត្រីអង្គការទេសន្តរប្រវេសន៍អន្តរជាតិ(IOM) បាននិយាយឲ្យដឹងថា ជនអន្តោប្រវេសន៍ ១៧.១៩០នាក់ ត្រូវបានស្ទាក់ចាប់ ហើយបញ្ជូនត្រឡប់ទៅប្រទេសលីប៊ីវិញ កាលពីឆ្នាំ២០២៣។

ចាប់តាំងពីការដួលរលំរបបរបស់លោក Muammar Gaddafi ក្នុងឆ្នាំ២០១១ អស្ថិរភាពកើតឡើងនៅក្នុងប្រទេសលីប៊ី បានបណ្តាលឱ្យជនអន្តោប្រវេសន៍ជាច្រើន ភាគច្រើនមកពីទ្វីបអាហ្រ្វិក បានប៉ុនប៉ងឆ្លងកាត់សមុទ្រមេឌីទែរ៉ាណេដោយគ្រោះថ្នាក់ ក្នុងសង្ឃឹមថានឹងទៅដល់អឺរ៉ុប។