សភាជាន់ទាបរបស់ប្រទេសម៉ិកស៊ិក បានចាប់ផ្តើមការពិភាក្សាលើកំណែទម្រង់ប្រព័ន្ធតុលាការដ៏ចម្រូងចម្រាសមួយកាលពីថ្ងៃអង្គារ (០៣ កញ្ញា) ស្របពេលមានការផ្អាកការងារដ៏កម្រដោយក្រុមចៅក្រមតុលាការកំពូលដើម្បីចូលរួមក្នុងការតវ៉ា។ តុលាការបាននិយាយក្នុងសេចក្តីថ្លែងការណ៍មួយថា ក្នុងសំឡេងគាំទ្រភាគច្រើន ៨ទល់នឹង៣ ចៅក្រមតុលាការកំពូលបានសម្រេចផ្អាកការងារដើម្បីចូលរួមកូដកម្ម ដែលមើលឃើញបុគ្គលិកតុលាការរាប់ពាន់នាក់ចូលរួម។

សភាជាន់ទាបសម៉ិកស៊ិក បានចាប់ផ្តើមការជជែកពិភាក្សាលើកំណែទម្រង់ប្រព័ន្ធតុលាការ ដែលបានធ្វើឱ្យទំនាក់ទំនងកាន់តែតានតឹងជាមួយអាមេរិក និងបង្កឱ្យមានការរង្គោះរង្គើក្នុងទីផ្សារ។ យោងតាមប្រភពពីតុលាការកំពូលបានឱ្យដឹងថា ការសម្រេចរបស់ចៅក្រមក្នុងការចូលរួមតវ៉ានេះគឺមិនធ្លាប់មានពីមុនមកទេនៅក្នុងប្រវត្តិសាស្ត្ររបស់ស្ថាប័ន។

គ្រោងឆ្អឹងនៃកំណែទម្រង់រដ្ឋធម្មនុញ្ញ ដែលស្នើឡើងដោយប្រធានាធិបតីផុតអាណត្តិ លោក អាន់ដ្រេស ម៉ានូអែល ឡូប៉េស អូប្រាដ័រ (Andres Manuel Lopez Obrador) នេះគឺអំពាវនាវឱ្យមានការបោះឆ្នោតឡើងវិញរបស់ចៅក្រម និងបុគ្គលិកតុលាការជាង ៧.០០០នាក់ រួមទាំងតុលាការកំពូលផងដែរ ក្នុងចំណោមការផ្លាស់ប្ដូរផ្សេងទៀត។

លោក Lopez Obrador អះអាងថាកំណែទម្រង់នេះគឺចាំបាច់ណាស់ដើម្បីឱ្យចៅក្រមមានភាពទទួលខុសត្រូវខ្ពស់ និងកាត់បន្ថយអំពើពុករលួយ ប៉ុន្តែក្រុមរិះគន់និយាយថា កំណែទម្រង់នេះនឹងមិនប៉ះពាល់ដល់រដ្ឋអាជ្ញា នគរបាល និងក្រសួងសាធារណៈ ដែលត្រូវបានស្ដីបន្ទោសថាជាពិរុទ្ធជនពិតប្រាកដនៃនិទណ្ឌភាព (ភាពរួចផុតពីសំណាញ់ច្បាប់) និងអំពើពុករលួយនោះទេ៕