​អាមេរិក៖ កាលពី​ថ្ងៃអាទិត្យ​ លោក Joe Biden ប្រធានាធិបតី​អាមេរិកបានស្នើ​ជួបពិភាក្សា​ភ្លាមៗ​ជាមួយ​សម​ភាគី​បារាំងលោក Emmanuel Macron ក្នុង​កិច្ចប្រឹងប្រែង​មួយ​ដើម្បី​ផ្សះផ្សារ បន្ទាប់ពី​ជម្លោះ​លើ​កិច្ចសន្យា​ទិញ​នាវាមុជទឹក​បង្កឱ្យមាន​ភាព​តានតឹង​ដ៏​កម្រ​រវាង​សម្ព័ន្ធមិត្ត​។

​សេចក្ដីប្រកាស​នេះមាន​ឡើង ​បន្ទាប់ពី​នាយករដ្ឋមន្ត្រី​អូស្ត្រាលី​លោក Scott Morrison បាន​ច្រានចោល​ការចោទប្រកាន់រ​បស់​បារាំង​ដែលថា ​ទីក្រុង​កង់​បេ​រ៉ា​បាន​កុហក​អំពី​គម្រោង​លុប​ចោល​កិច្ចសន្យា​ទិញ​នាវាមុជទឹក​របស់​បារាំង​ ដោយ​និយាយថា ​លោក​បានលើកឡើង​ពី​កង្វល់​ជុំវិញ​កិច្ចព្រមព្រៀង​នេះ​កាលពី​ប៉ុន្មាន​ខែ​មុន​។ ការសម្រេចចិត្ត​របស់​អូស្ត្រាលី​ក្នុង​លុបចោល​កិច្ចព្រមព្រៀង​បារាំង ងាក​ទៅ​ទិញ​នាវា​ដំណើរការ​ដោយ​ថាមពលនុយក្លេអ៊ែរ​រប​ស់​អាមេរិក​វិញ បាន​បង្ក​ឱ្យ​ផ្ទុះកំហឹង​នៅ​ទីក្រុង​ប៉ារីស ដោយ​លោក Macron បាន​កោះហៅ​ឯកអគ្គរដ្ឋទូត​បារាំង​ប្រចាំ​ទីក្រុង​កង់​បេ​រ៉ា ​និង​វ៉ាស៊ីនតោន ​ជា​សកម្មភាព​ដែល​មិន​ធ្លាប់មាន​ពីមុនមក​។​

​ប៉ុន្តែ​អ្នកនាំពាក្យ​រដ្ឋាភិបាល​បារាំង​លោក Gabriel Attal បាន​និយាយ​កាលពី​ថ្ងៃអាទិត្យ​ថា​ នឹងមាន​ការសន្ទនា​តាម​ទូរស័ព្ទ​រវាង​លោក Biden និង​លោក Macron “នៅ​ប៉ុន្មាន​ថ្ងៃ​ខាងមុខនេះ​” តាម​សំណើ​របស់​ប្រធានាធិបតី​អាមេរិក​៕

អត្ថបទ៖ សុខមាន