សារព័ត៌មានរាជវង្ស រ៉ូយ៉ាល់កាសែត (Royal Gazette) បានបង្ហាញថា ព្រះមហាក្សត្រថៃ ព្រះអង្គ មហា វិច្ចរ៉ាឡុងកន (Maha Vajiralongkorn) នៅថ្ងៃពុធ (០៤ កញ្ញា) នេះបានរាជានុម័តលើគណៈរដ្ឋមន្ត្រីថ្មីរបស់លោកស្រីនាយករដ្ឋមន្ត្រី ផែថងថាន ស៊ីណាវ៉ាត់ (Paetongtarn Shinawatra)។

បញ្ជីរាយនាមគណៈរដ្ឋមន្ត្រីនឹងមើលឃើញការបន្តតំណែងនៃឥស្សរជនសំខាន់ៗ ដោយរដ្ឋមន្ត្រីហិរញ្ញវត្ថុបច្ចុប្បន្ន លោក ភិឆៃ ឈុនហាវិច្ចរ៉ា (Pichai Chunhavajira) និងរដ្ឋមន្ត្រីការបរទេស លោក ម៉ារីត សាង៉ាមពង្ស (Maris Sangiampongsa) នៅរក្សាតំណែងរបស់ពួកគេដដែល។

ព្រះរាជានុម័តនេះជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់រដ្ឋបាលថ្មីដើម្បីធានាស្ថិរភាព និងបន្តនៅក្នុងអភិបាលកិច្ចរបស់ប្រទេសថៃ។ មន្ត្រីជាន់ខ្ពស់មួយរូបបាននិយាយថា នៅពេលដែលបានរាជានុម័តរួច បណ្ដារដ្ឋមន្ត្រីថ្មីនឹងតម្រូវឱ្យធ្វើសច្ចាប្រណិធាននៅចំពោះព្រះភ័ក្ត្រព្រះមហាក្សត្រ មុនពេលពួកគេអាចកោះប្រជុំដើម្បីពិភាក្សា និងប្រកាសអំពីសេចក្តីថ្លែងការណ៍គោលនយោបាយបាន។

អ្នកនយោបាយវ័យក្មេង លោកស្រី ផែថងថាន បានឈ្នះការគាំទ្រពីសភាក្លាយជានាយករដ្ឋមន្ត្រីវ័យក្មេងបំផុតរបស់ប្រទេសថៃ កាលពីពាក់កណ្ដាលខែសីហា ត្រឹមតែមួយថ្ងៃប៉ុណ្ណោះបន្ទាប់ពីលោកស្រីទទួលបានបេក្ខភាព ស្របពេលមានការតស៊ូអំណាចមិនឈប់ឈររវាងក្រុមឥស្សរជនក្នុងប្រទេស៕