អង្គការជំនួយអន្តរជាតិចំនួនបី កាលពីថ្ងៃអង្គារ បានចេញការព្រមានយ៉ាងខ្លាំងអំពីវិបត្តិមនុស្សធម៌ ដែលកំពុងកើនឡើង នៅក្នុងប្រទេសស៊ូដង់ ដោយប្រកាសថា ប្រទេសនេះ កំពុងជួបប្រទះវិបត្តិស្រេកឃ្លាន ក្នុងសមាមាត្រដែលមិនធ្លាប់មានពីមុនមក។

ក្រុមប្រឹក្សាជនភៀសខ្លួនន័រវែស ក្រុមប្រឹក្សាជនភៀសខ្លួនដាណឺម៉ាក និងអង្គការ Mercy Corps បាននិយាយនៅក្នុងសេចក្តីថ្លែងការណ៍រួមថា ប្រជាជនស៊ូដង់ កំពុងស្លាប់ដោយភាពស្រេកឃ្លាន ចំពេលភាពស្ងៀមស្ងាត់ «គ្មានការឆ្លើយតប» ពីសហគមន៍អន្តរជាតិ។

ក្រុមផ្តល់ជំនួយ បាននិយាយថា៖«កម្រិតនៃការរងទុក្ខវេទនារបស់ប្រជាជនស៊ូដង់ក្នុងរយៈពេលប៉ុន្មានខែថ្មីៗនេះ គឺមិនអាចបង្ហាញដោយត្រឹមពាក្យសម្តីបានទេ។ ពួកគេ បានកត់សម្គាល់ឃើញថា ការឆ្លើយតបពីអន្តរជាតិ មានភាពមិនគ្រប់គ្រាន់ទាល់តែសោះ ដោយផែនការឆ្លើយតបមនុស្សធម៌ដែលដឹកនាំដោយអង្គការសហប្រជាជាតិបច្ចុប្បន្ន ផ្តល់មូលនិធិត្រឹមតែ ៤១ភាគរយប៉ុណ្ណោះ។

សេចក្តីថ្លែងការណ៍ បាននិយាយថា៖«ភាពស្ងៀមស្ងាត់ កំពុងធ្វើឲ្យគ្មានការឆ្លើយតប។ មនុស្សកំពុងស្លាប់ដោយភាពស្រេកឃ្លានជារៀងរាល់ថ្ងៃ ហើយការយកចិត្តទុកដាក់ នៅតែផ្តោតទៅលើការជជែកវែកញែក ទាក់ទងនឹងជំនួយ និងភាពច្បាស់លាស់តាមច្បាប់»។