ប្រភពពីមន្ត្រីក្រសួងសន្តិសុខមាតុភូមិអាមេរិក (DHS) បានប្រាប់សារព័ត៌មានរ៉យទ័រថា ក្រុមមន្ត្រីរដ្ឋបាលលោកប្រធានាធិបតី ចូ បៃដិន (Joe Biden) កំពុងថ្លឹងថ្លែងថាតើត្រូវពង្រឹងការហាមឃាត់សិទ្ធិជ្រកកោនដើម្បីរក្សាកម្រិតទាបនៃការឆ្លងដែនខុសច្បាប់នៅព្រំដែនអាមេរិក-ម៉ិកស៊ិក ឱ្យកាន់តែតឹងតែងឬយ៉ាងណា ចាប់តាំងពីបម្រាមនេះចូលជាធរមានក្នុងខែមិថុនា មក។

ការហាមប្រាមនេះអាចនឹងត្រូវបានដកចេញ ប្រសិនបើចំនួនជនអន្តោប្រវេសន៍ដែលចាប់ខ្លួនបានពីការឆ្លងកាត់ព្រំដែនភាគខាងត្បូងដោយខុសច្បាប់ ធ្លាក់ចុះក្រោមកម្រិតមធ្យម ១.៥០០នាក់ក្នុងមួយថ្ងៃ សម្រាប់រយៈពេលមួយសប្តាហ៍។ មន្ត្រីក្រសួង DHS បាននិយាយថា វិធានការដែលកំពុងពិភាក្សានេះនឹងមើលឃើញការអូសបន្លាយពេលវេលាដែលចំនួនមនុស្សចាប់ខ្លួនបានត្រូវតែស្ថិតក្រោមកម្រិតកំណត់នោះ រហូតដល់ជាច្រើនសប្តាហ៍។

កម្រិត ១.៥០០នាក់នោះមិនទាន់ឈានដល់នៅឡើយទេ។ កាលពីខែកក្កដា កងល្បាតព្រំដែនអាមេរិកបានចាប់ជនអន្តោប្រវេសន៍ជាមធ្យម ១.៨២០នាក់ក្នុងមួយថ្ងៃ។ កាលពីខែធ្នូ ឆ្នាំមុន ចំនួននេះឡើងដល់ ១០.៨០០នាក់ក្នុងមួយថ្ងៃ ដែលនៅពេលនោះក្រុមមន្ត្រីនិយាយថាជាកម្រិតមួយជិតដល់កំណត់ត្រា។

អន្តោប្រវេសន៍ខុសច្បាប់គឺជាក្ដីកង្វល់ដ៏ធំរបស់អ្នកបោះឆ្នោតនៅអាមេរិក ដែលត្រៀមនឹងបោះឆ្នោតនៅថ្ងៃទី០៥ ខែវិច្ឆិកា ដើម្បីសម្រេចជ្រើសរើសអ្នកគ្រប់គ្រងសេតវិមាន និងសភា។ យោងតាមតួលេខរបស់រដ្ឋាភិបាលអាមេរិកបង្ហាញថា ចំនួនជនអន្តោប្រវេនស៍ដែលត្រូវបានចាប់ខ្លួនដោយខុសច្បាប់ឆ្លងកាត់ព្រំដែនអាមេរិក-ម៉ិកស៊ិក បានធ្លាក់ចុះមកនៅត្រឹម ៥៦.០០០នាក់ក្នុងខែកក្កដា ពីតួលេខ ១១៨.០០០នាក់នៅក្នុងខែឧសភា៕