ប្រមុខការទូតរបស់ទីក្រុងសេអ៊ូល បាននិយាយកាលពីថ្ងៃពុធថា កិច្ចសហប្រតិបត្តិការត្រីភាគីរវាងកូរ៉េខាងត្បូង សហរដ្ឋអាមេរិក និងជប៉ុន នឹងបន្តរីកចម្រើន ទោះបីជាមានរដ្ឋបាលថ្មីនៅទីក្រុងវ៉ាស៊ីនតោន និងតូក្យូ បន្ទាប់ពីការបោះឆ្នោតរបស់ពួកគេក៏ដោយ។

រដ្ឋមន្ត្រីការបរទេសលោក Cho Tae-yul បានធ្វើការអត្ថាធិប្បាយនេះ ខណៈដែលសហរដ្ឋអាមេរិក និងជប៉ុន គ្រោងនឹងជ្រើសរើសមេដឹកនាំថ្មីរបស់ពួកគេ នៅក្នុងការបោះឆ្នោតខាងមុខនេះ នៅថ្ងៃទី ៥ ខែវិច្ឆិកា និងថ្ងៃទី ២៧ ខែកញ្ញា រៀងៗខ្លួន។ ប្រទេសទាំងបី បានពង្រឹងកិច្ចសហប្រតិបត្តិការសន្តិសុខរបស់ពួកគេនៅក្រោមមេដឹកនាំបច្ចុប្បន្ន បន្ទាប់ពីកិច្ចប្រជុំកំពូលត្រីភាគីនៅវិមានលំហែកម្សាន្ត Camp David កាលពីខែសីហា ឆ្នាំមុន។

លោក Cho បាននិយាយនៅក្នុងសុន្ទរកថាមួយ នៅឯកិច្ចសន្ទនាប្រតិបត្តិត្រីភាគី (TED) វេទិកាសន្ទនារដ្ឋាភិបាល-ធុរកិច្ចលើបញ្ហាសេដ្ឋកិច្ច និងសន្តិសុខថា៖«កិច្ចសហប្រតិបត្តិការកូរ៉េខាងត្បូង-អាមេរិក-ជប៉ុន មានមុខងារដ៏សំខាន់បំផុត ដែលដំណើរការស្របគ្នាជាមួយសម្ព័ន្ធភាពកូរ៉េខាងត្បូង-សហរដ្ឋអាមេរិក។ 

លោក Cho បាននិយាយថា៖«ខ្ញុំមានទំនុកចិត្តថា ភាពជាដៃគូនេះ នឹងបន្តពង្រឹង ទោះបីជានៅក្រោមការដឹកនាំរបស់រដ្ឋាភិបាលថ្មី ដោយសារមានការយល់ស្របយ៉ាងទូលំទូលាយលើសារៈសំខាន់របស់វានោះ»។