អ្នកនាំពាក្យប្រធានាធិបតីរុស្ស៊ី លោក Dmitry Peskov បានប្រាប់សារព័ត៌មាន Izvestia daily ថា ឥណ្ឌាអាចជួយបង្កើតកិច្ចសន្ទនាមួយស្តីពីអ៊ុយក្រែន ប៉ុន្តែទីក្រុងមូស្គូ មើលមិនឃើញបុរេលក្ខខណ្ឌសម្រាប់កិច្ចចរចា រហូតមកទល់ពេលនេះ។

អ្នកនាំពាក្យវិមានក្រឹមឡាំង បានទាក់ទាញការយកចិត្តទុកដាក់ចំពោះ «ទំនាក់ទំនងប្រកបដោយភាពស្ថាបនាខ្ពស់ កាន់តែជិតស្និទ្ធ» រវាងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី ( Narendra Modi) និងប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) ។ យោងតាមលោក Peskov លោក ម៉ូឌី អាច«ជាមនុស្សទី១ក្នុងការទទួលបានព័ត៌មានផ្ទាល់ពីអ្នកចូលរួមក្នុងជម្លោះនេះ» ខណៈដែលលោក«ទំនាក់ទំនងដោយសេរីជាមួយលោកពូទីន ជាមួយ [ប្រធានាធិបតីអ៊ុយក្រែន] វ្ល៉ូឌីមី ហ្ស៊េឡិនស្គី និងជាមួយជនជាតិអាមេរិកផងដែរនោះ»។

លោក Peskov បាននិយាយថា៖«នេះ ផ្តល់ឱកាសដ៏ល្អសម្រាប់ប្រទេសឥណ្ឌា ក្នុងការប្រើឥទ្វិពលរបស់ខ្លួននៅក្នុងកិច្ចការពិភពលោក និងប្រើប្រាស់ឥទ្ធិពលរបស់ខ្លួន ដែលនឹងជំរុញឲ្យជនជាតិអាមេរិក និងអ៊ុយក្រែនឆ្ពោះទៅរកការប្រើប្រាស់ឆន្ទៈនយោបាយកាន់តែធំ និងចូលទៅក្នុងផ្លូវដោះស្រាយដោយសន្តិវិធី»។

ទន្ទឹមនឹងនេះ លោកបានសង្កត់ធ្ងន់ថា មិនមានផែនការជាក់លាក់ណាមួយសម្រាប់លទ្ធភាពបេសកកម្មសម្របសម្រួលរបស់លោក Modi នោះទេ។ អ្នកនាំពាក្យវិមានក្រឹមឡាំងរូបនេះ បានកត់សម្គាល់ថា៖«នៅពេលនេះ ផែនការទាំងនោះ ស្ទើរតែមិនអាចកើតឡើងទេ ព្រោះយើងមិនឃើញមានបុរេលក្ខខណ្ឌសម្រាប់ការចរចា នៅពេលនេះ»។