រដ្ឋមន្ត្រីការបរទេសអាមេរិក លោក អង់តូនី ប៊្លីនខិន (Antony Blinken) បាននិយាយថា ការសម្រេចបានបទឈប់បាញ់ នៅតំបន់ហ្កាហ្សាស្ទ្រីប គឺអាស្រ័យលើចលនាបដិវត្តន៍ហាម៉ាស(HAMAS) នៅប៉ាឡេ ស្ទីន និងរដ្ឋាភិបាលអ៊ីស្រាអែល ហើយសហរដ្ឋអាមេរិកសង្ឃឹមថា នឹងទទួលបានការឆ្លើយតបរបស់ពួកគេ នៅថ្ងៃប៉ុន្មានថ្ងៃខាងមុខនេះ ។

លោកបានថ្លែងប្រាប់អ្នកសារព័ត៌មានក្នុងអំឡុងពេលបំពេញទស្សនកិច្ចនៅប្រទេសហៃទីថា៖«ដូច្នេះនៅត្រង់ចំណុចនេះ ខ្ញុំចង់និយាយថា វាពិតជាមានតួនាទីសម្រាប់ភាគីទាំងពីរ ក្នុងការយល់ស្របលើបញ្ហាដែលនៅសេសសល់ទាំងនេះ ហើយយើងកំពុងពិភាក្សាយ៉ាងសកម្មជាមួយដៃគូរបស់យើងក្នុងកិច្ចខិតខំប្រឹងប្រែងនេះ ដែលមានប្រទេសអេហ្ស៊ីប និងកាតា។ ខ្ញុំរំពឹងថា នៅប៉ុន្មានថ្ងៃខាងមុខនេះ យើងនឹងចែករំលែកជាមួយអ៊ីស្រាអែល ហើយពួកគេនឹងចែករំលែកជាមួយក្រុមហាម៉ាសនូវគំនិតរបស់ពួកយើងទាំងបីនាក់ អំពីរបៀបដោះស្រាយបញ្ហាដែលនៅសល់»។

មុននេះ ប្រមុខការទូតអាមេរិក បាននិយាយថា លទ្ធភាពនៃកិច្ចព្រមព្រៀងបទឈប់បាញ់ ភាគច្រើនពឹងផ្អែកលើក្រុមហាម៉ាស និងប្រធានការិយាល័យនយោបាយរបស់ខ្លួនគឺលោក យ៉ាយ៉ា សារ៉ា ( Yahya Saria) ។

កាលពីថ្ងៃទី ១៥-១៦ ខែសីហា ទីក្រុងដូហា បានរៀបចំកិច្ចពិភាក្សាជុំថ្មីមួយសំដៅឈានដល់កិច្ចព្រមព្រៀងមួយស្តីពីការដោះលែងចំណាប់ថ្នូរដែលឃុំខ្លួននៅតំបន់ហ្កាហ្សាស្ទ្រីប និងការអនុវត្តបទឈប់បាញ់នៅទីនោះ។ មេដឹកនាំនៃប្រទេសអេហ្ស៊ីប កាតា និងសហរដ្ឋអាមេរិក បាននិយាយនៅក្នុងសេចក្តីថ្លែងការណ៍រួមរបស់ពួកគេ បន្ទាប់ពីកិច្ចពិភាក្សាថា ការចរចា ត្រូវបានធ្វើឡើងក្នុងបរិយាកាសវិជ្ជមាន។