មេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) បានលើកទឹកចិត្តដល់ក្រុមនាវិកនៅលើនាវាចម្បាំងដែលត្រៀមប្រយុទ្ធនៅឯមូលដ្ឋានសំខាន់មួយក្នុងច្រកសមុទ្រតៃវ៉ាន់ នៅសុក្រ (០៦ កញ្ញា) នេះដោយនិយាយថា កោះតៃវ៉ាន់ទាំងមូលជាខ្នងបង្អែករបស់ពួកគេ ដោយថ្លែងអំណរគុណដល់អ្នកទាំងនោះសម្រាប់ការការពារសន្តិសុខតៃវ៉ាន់ នៅពេលមានភាពតានតឹងកាន់តែខ្លាំងជាមួយទីក្រុងប៉េកាំង។

ប្រទេសចិន ដែលអះអាងសិទ្ធិលើកោះស្វ័យគ្រប់គ្រងតៃវ៉ាន់ជុំវិញការជំទាស់យ៉ាងខ្លាំងរបស់រដ្ឋាភិបាលទីក្រុងតៃប៉ិ បានរិះគន់លោក Lai ថាជា «ជនផ្ដាច់ខ្លួន» និងបានរៀបចំហ្គេមសង្គ្រាម (សមយុទ្ធទ្រង់ទ្រាយធំ) ជុំវិញកោះនេះក្នុងខែឧសភា ភ្លាមៗបន្ទាប់ពីការចូលកាន់តំណែងរបស់លោក។

ថ្លែងទៅកាន់នាវិកនៅលើនាវាចម្បាំង ឆឹងហូ (Cheng Ho) នៅមូលដ្ឋាន ម៉ាកុង (Magong) នៅលើកោះ ផឹងហ៊ូ (Penghu) ក្នុងច្រកសមុទ្រតៃវ៉ាន់ លោក Lai បាននិយាយថា «កងទ័ពជើងទឹកបានបង្កើតសមិទ្ធផលដ៏អស្ចារ្យដែលរួបរួមគ្នាការពារសន្តិសុខ»។ នាវា ឆឹងហូ ដែលដាក់ឈ្មោះតាមឧត្តមនាវីនិងអ្នករុករកជនជាតិចិនក្នុងរាជវង្សម៉េង គឺជានាវាចម្បាំងដែលផលិតដោយតៃវ៉ាន់ ដោយផ្អែកលើការរចនាដូចនាវាចម្បាំងប្រភេទ អូលីវើ ហាហ្សាដ ភើរី (Oliver Hazard Perry) របស់អាមេរិក។

ថ្លែងក្នុងពេលដែលមីស៊ីលស្តង់ដារ RIM-66 ត្រូវបានបំពាក់រួចជាស្រេចនៅក្នុងឧបករណ៍បាញ់របស់នាវា លោក Lai បាននិយាយថា រដ្ឋាភិបាលបានប្តេជ្ញាចិត្តក្នុងការពង្រឹងបន្ថែមទៀតនូវសព្វាវុធរបស់កងកម្លាំងប្រដាប់អាវុធ។ កោះផឹងហ៊ូ ជាជម្រកសម្រាប់មូលដ្ឋានទ័ពអាកាសដ៏សំខាន់មួយ ដែលយន្តហោះចម្បាំងរបស់កងទ័ពអាកាសតៃវ៉ាន់ ឃ្លាំមើលជាប្រចាំនៃយន្តហោះយោធា និងនាវាចម្បាំងរបស់ចិន ដែលប្រតិបត្តិការជុំវិញកោះ៕