រដ្ឋាភិបាលអាល្លឺម៉ង់ បានប្រកាសពីផែនការដាក់ការគ្រប់គ្រងឱ្យកាន់តែតឹងរ៉ឹងនៅគ្រប់ព្រំដែនដីគោករបស់ប្រទេស ក្នុងអ្វីដែលខ្លួនហៅថាការប៉ុនប៉ងដើម្បីដោះស្រាយអន្តោប្រវេនស៍មិនទៀងទាត់ និងការពារសាធារណជនពីការគំរាមកំហែងនានាដូចជាក្រុមអ៊ីស្លាមជ្រុលនិយម។

រដ្ឋមន្ត្រីក្រសួងមហាផ្ទៃ លោកស្រី នែនស៊ី ហ្វេហ្សា (Nancy Faeser) បាននិយាយកាលពីថ្ងៃចន្ទ (០៩ កញ្ញា) ថាការគ្រប់គ្រងតឹងរ៉ឹងនៅក្នុងតំបន់ដ៏ធំទូលាយនៃការចល័តដោយសេរី ពោលគឺតំបន់ ស៊្ហែង៉ិន (Schengen) របស់អឺរ៉ុប នឹងចាប់ផ្តើមនៅថ្ងៃទី១៦ ខែកញ្ញា ហើយដំណាក់កាលដំបូងមានរយៈពេលប្រាំមួយខែ។ លោកស្រី Faeser បាននិយាយថា រដ្ឋាភិបាលក៏បានរៀបចំគម្រោងមួយដែលអាចឱ្យអាជ្ញាធរបដិសេធជនអន្តោប្រវេសន៍បន្ថែមទៀតដោយផ្ទាល់នៅតាមព្រំដែនអាល្លឺម៉ង់ ដោយមិនបានបន្ថែមព័ត៌មានលម្អិតពីវិធានការដ៏ចម្រូងចម្រាស និងស្របច្បាប់មួយនេះទេ។

ការរឹតបន្តឹងនេះគឺជាផ្នែកមួយនៃវិធានការជាបន្តបន្ទាប់ដែលអាល្លឺម៉ង់បានអនុវត្តដើម្បីពង្រឹងជំហររបស់ខ្លួនលើការធ្វើអន្តោប្រវេនស៍មិនទៀងទាត់ក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីកំណើនដ៏ខ្លាំងក្លានៃអ្នកមកដល់ ជាពិសេសអ្នកដែលភៀសខ្លួនពីសង្គ្រាម និងភាពក្រីក្រនៅមជ្ឈិមបូព៌ា។ រដ្ឋាភិបាលរបស់លោកអធិការបតី អូឡា សូស (Olaf Scholz) កំពុងស្វះស្វែងដណ្តើមការគាំទ្រមកវិញពីក្រុមប្រឆាំងស្តាំនិយមជ្រុល និងពួកអភិរក្សនិយម ដែលបានឃើញការគាំទ្រកើនឡើងនៅពេលដែលពួកគេចាក់ចំចំណុចនៃកង្វល់របស់អ្នកបោះឆ្នោតពីសេវាសាធារណៈដ៏ទ្រុឌទ្រោម សមាហរណកម្ម និងសន្តិសុខ។

ការវាយប្រហារដោយកាំបិតសម្លាប់មនុស្សកាលពីពេលថ្មីៗនេះដែលជនសង្ស័យជាអ្នកស្វែងរកសិទ្ធិជ្រកកោន បានធ្វើឱ្យមានការព្រួយបារម្ភអំពីអន្តោប្រវេសន៍កាន់តែខ្លាំង។ បក្សជម្រើសថ្មីសម្រាប់អាល្លឺម៉ង់ AfD នៅដើមខែនេះ បានក្លាយជាបក្សស្តាំនិយមជ្រុលដំបូងគេចាប់តាំងពីសង្គ្រាមលោកលើកទី២ ដែលបានឈ្នះការបោះឆ្នោតតំបន់នៅរដ្ឋ ធូរីងងិន (Thuringia) បន្ទាប់ពីបានសម្រុកធ្វើយុទ្ធនាការលើបញ្ហាអន្តោប្រវេនស៍៕