ប្រធានសិទ្ធិមនុស្សរបស់អង្គការសហប្រជាជាតិ បាននិយាយកាលពីថ្ងៃចន្ទ (០៩ កញ្ញា) ថា ប្រតិបត្តិការយោធាធំៗរបស់អ៊ីស្រាអែល នៅទូទាំងតំបន់កាន់កាប់ វេសបែង (West Bank) កំពុងធ្វើឱ្យស្ថានភាព “ដ៏គ្រោះថ្នាក់” រួចទៅហើយនៅទីនោះកាន់តែអាក្រក់ទៅៗ ស្របពេលអំពើហិង្សារបស់អ្នកតាំងលំនៅកាន់តែធ្ងន់ធ្ងរ។

ក្នុងការបើកសម័យប្រជុំនៃក្រុមប្រឹក្សាសិទ្ធិមនុស្សអង្គការសហប្រជាជាតិនៅទីក្រុងហ្សឺណែវ លោក វ៉ុលឃើ ធឺក (Volker Turk) បានរិះគន់ការកើនឡើងនៃអំពើហិង្សានៅតំបន់ West Bank ស្របពេលមានការវាយឆ្មក់ដ៏ធំរបស់អ៊ីស្រាអែល។ លោក Turk បានប្រាប់ក្រុមប្រឹក្សាថា “នៅក្នុងតំបន់ West Bank ប្រតិបត្តិការដ៏បង្ហូរឈាម និងបំផ្លិចបំផ្លាញ ដែលមួយចំនួនស្ថិតក្នុងកម្រិតមួយដែលមិនធ្លាប់ឃើញក្នុងពេលពីរទសវត្សរ៍ចុងក្រោយនេះ កំពុងធ្វើឱ្យស្ថានការណ៍នៅទីនោះកាន់តែអាក្រក់ ហើយអំពើហិង្សាអ្នកតាំងលំនៅបានបង្កភាពធ្ងន់ធ្ងរថែមទៀត”។

អំពើហិង្សានៅតំបន់ West Bank បានកើនឡើងស្របគ្នានឹងសង្រ្គាមនៅហ្កាហ្សា ដែលចាប់ផ្តើមបន្ទាប់ពីក្រុមហាម៉ាស បានវាយប្រហារអ៊ីស្រាអែលកាលពីថ្ងៃទី០៧ ខែតុលា ឆ្នាំ២០២៣។ យោធាអ៊ីស្រាអែល កាលពីថ្ងៃទី២៨ ខែសីហា បានបើកការវាយឆ្មក់ក្នុងពេលដំណាលគ្នានៅទូទាំងទីក្រុងជាច្រើន និងជំរំជនភៀសខ្លួននៅភាគខាងជើង West Bank ដោយបានសម្លាប់ប្រជាជនប៉ាឡេស្ទីនយ៉ាងហោចណាស់ ៣៦នាក់។

យោធាបាននិយាយថា ខ្លួនបានសម្លាប់ពួកសកម្មប្រយុទ្ធចំនួន ៣៥នាក់ ខណៈក្រុមហាម៉ាស និងជីហាតអ៊ីស្លាមប៉ាឡេស្ទីនបានអះអាងថា មានអ្នកស្លាប់យ៉ាងតិច ១៤នាក់ប៉ុណ្ណោះជាសមាជិកខ្លួន។ យោងតាមក្រសួងសុខាភិបាលប៉ាឡេស្ទីនបានឱ្យដឹងថា ចាប់តាំងពីថ្ងៃទី០៧ ខែតុលា ឆ្នាំមុនមក ទាហានអ៊ីស្រាអែល ឬអ្នកតាំងលំនៅបានសម្លាប់ជនជាតិប៉ាឡេស្ទីនយ៉ាងហោចណាស់ ៦៦២នាក់នៅតំបន់ West Bank៕