ក្រសួងការពារជាតិរុស្ស៊ី បាននិយាយថា ប្រព័ន្ធការពារដែនអាកាសរបស់រុស្ស៊ី បានស្ទាក់ចាប់ និងកម្ទេច យានដ្រូនរបស់អ៊ុយក្រែនចំនួន ១៤៤គ្រឿង នៅលើតំបន់ចំនួន ៩ របស់រុស្ស៊ី ក្នុងរយៈពេលមួយយប់។

ទីភ្នាក់ងារយោធា បាននិយាយនៅក្នុងសេចក្តីថ្លែងការណ៍មួយថា៖«រយៈពេលពេញមួយយប់ ក្នុងអំឡុងការប៉ុនប៉ងរបស់របបទីក្រុងគីវ ដើម្បីធ្វើការវាយប្រហារភេរវកម្មលើគោលដៅនានា ក្នុងប្រទេសរុស្ស៊ី ជាមួយនឹងការប្រើប្រាស់យានដ្រូន ប្រព័ន្ធការពារដែនអាកាសដែលបំពេញកាតព្វកិច្ច បានលុបបំបាត់ និងស្ទាក់ចាប់យានដ្រូនរបស់អ៊ុយក្រែនចំនួន ១៤៤គ្រឿង៖ យានដ្រូន UAV ចំនួន ៧២ គ្រឿង នៅលើតំបន់ Bryansk ២០គ្រឿងលើតំបន់មូស្គូ, ១៤គ្រឿងលើតំបន់ Kursk, ១៣គ្រឿងលើតំបន់ Tula, ៨គ្រឿងលើតំបន់ Belgorod, ៧គ្រឿងលើតំបន់ Kaluga ៥គ្រឿងលើតំបន់ Voronezh, ៤គ្រឿងលើតំបន់ Lipetsk និងមួយគ្រឿងទៀតនៅតំបន់ Oryol»។  

យោងតាមអភិបាលតំបន់ Bryansk លោក Alexander Bogomaz មិនទាន់មានអ្នកស្លាប់ ឬការខូចខាតនៅក្នុងតំបន់នេះទេ ដែលជាលទ្ធផលនៃការវាយប្រហារដ៏ធំដោយកងកម្លាំងប្រដាប់អាវុធអ៊ុយក្រែន។ ប្រធានតំបន់ Voronezh លោក Alexander Gusev បានសរសេរនៅលើបណ្តាញ Telegram របស់ខ្លួន ថា យោងតាមទិន្នន័យបឋម មិនមានការខូចខាត ឬជនរងគ្រោះត្រូវបានកត់ត្រា នៅក្នុងតំបន់នោះទេ។