ប្រមុខរាជរដ្ឋាភិបាល ជំរុញឱ្យវិស័យឯកជន ងាកទៅរកការកែច្នៃ​ចេញ​ពី​ផលិតផល​វិស័យ​កសិកម្ម​ឱ្យទៅ​​ជាផលិតផលឧស្សាហកម្ម ដែលមានគុណវុឌ្ឍិអាចឆ្លើយតបទៅនិងតម្រូវការទីផ្សារ និង​មាន​តម្លៃ​បន្ថែម​ខ្ពស់ ខណៈកម្ពុជាមានទិន្នផលក្នុងវិស័យកសិកម្មនេះច្រើន។

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មាន​ប្រសាសន៍​លើក​ឡើង​នៅ​ក្នុងពិធីបិទ វេទិកាស្រូវអង្ករកម្ពុជាលើកទី៧ ឆ្នាំ២០២៤ នៅថ្ងៃទី ១០ ខែ កញ្ញា ឆ្នាំ ២០២៤ នេះថា កម្ពុជាបាននាំចេញស្រូវមានបរិមាណជាង ៤ លានតោន និង​បាន​នាំ​ចេញ​ផលិត​ផល​មិន​ទាន់​កែច្នៃផ្សេងៗទៀតជាច្រើន។ ជាក់ស្តែងកម្ពុជាគឺមានទិន្នផលច្រើន ហើយយើងក៏មិន អាច​គិតគូរតែលើការដាំដុះ និងលក់វត្ថុធាតុដើមតែមួយមុខនោះទេ គឺយើង​ត្រូវ​ខិតខំ​ជំរុញ​ឱ្យ​មាន​ការ​កែច្នៃ​ចេញពីវត្ថុធាតុដើមទាំងនេះ ឱ្យទៅជាផលិតផលឧស្សាហកម្ម ដែលមានគុណវឌ្ឍិ និង​អាច​ឆ្លើយ​តបទៅនិងតម្រូវទីផ្សារផ្សេងៗ។

សម្ដេចធិបតី មានប្រសាសន៍បន្តថា កម្ពុជាមានទីផ្សារជាច្រើនរួចហើយ ក្នុងនោះយើង​អាច​នាំ​ចេញ​ផលិតផ​លកែច្នៃ ដោយមិន ជាប់ពន្ធនាំចូលនោះឡើយ ស្របពេលច្បាប់វិនិយោគថ្មី ក៏​បាន​ផ្តល់​ការ​លើកទឹកចិត្តយ៉ាងច្រើនដល់វិស័យកសិកម្ម ក្នុងការកែច្នៃសម្រាប់ នាំចេញ ជាពិសេស​ការ​កែច្នៃ​ដដែល​ប្រើប្រាស់ប្រភពវត្ថុធាតុដើមក្នុងស្រុកទាំងនាំចេញនៅក្នុងស្រុក ។ សម្ដេចមហាបវរធិបតី មាន ប្រសាសន៍លើកឡើងបន្ថែមថា កន្លងមកនេះ សម្តេច​បាន​ជួប​ជា​មួយ​ប្រធាន​ក្រុមហ៊ុនហេននីហ្គីន ប្រចាំតំបន់អាស៊ីប៉ាស៊ីហ្វិក ដោយ គាត់បានបញ្ជាក់ថា បច្ចុប្បន្នក្រុម​ហ៊ុន​ហេន​នីហ្គីន មិនបានយកស្រូវសាលីពីក្រៅមកទាំងអស់នោះឡើយ, គឺមួយផ្នែកមកពីក្រៅ ហើយ មួយផ្នែកធំគឺបានយកអង្ករក្នុងស្រុកតែម្តង, ដែលការកែច្នៃក្នុងស្រុកនេះ គឺ​ជា​ការ​ចូល​រួម​ចំណែក​បង្កើតទីផ្សារនៅនឹងកន្លែង។

ជុំវិញបញ្ហា​ស្រូវអង្ករនេះ, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក៏បានអំពាវនាវ​ឱ្យ​វិស័យ​ឯកជន និងតួអង្គពាក់ព័ន្ធនៅ ក្នុងវិស័យស្រូវអង្កររបស់កម្ពុជា បន្តរក្សាឱ្យបាន​ខ្ជាប់​ខ្ជួន​នូវ​គុណភាព ស្តង់ដារ និងស្ថិរភាពផ្គត់ផ្គង់ និងខិតខំជួយការពារកេរឈ្មោះដ៏ ល្អប្រពៃ​នៃ​ស្រូវអង្ករ​របស់​កម្ពុជា​, ពីព្រោះនេះគឺជាផលប្រយោជន៍រួមរបស់កម្ពុជា ដែលបញ្ហនេះកម្ពុជា​ពិត​ជា​ខិតខំ​ប្រឹង​ប្រែង​យ៉ាង​ខ្លាំង និង ប្រើពេលវេលាជាច្រើននៅក្នុងការកសាងកេរឈ្មោះ ទម្រំ​ទទួល​បាន​នៃ​ការ​ទទួល​ស្គាល់ និងទំនុកទុកចិត្តដូចពេលបច្ចុប្បន្ន ។ ដូច្នេះ យើងត្រូវ​រួម​គ្នា​រក្សា​កេរ​ឈ្មោះ​នេះ​កុំ​ឱ្យ​បាត់​បង់​ ដើម្បីផលប្រយោជន៍​យូ​រអង្វែងរបស់វិស័យកសិកម្មនៅកម្ពុជា៕ អត្ថបទ៖ សុន រ៉ាឌី