វេជ្ជបណ្ឌិតហាត់ការនៅក្នុងរដ្ឋ វេស បេនហ្កាល់ (West Bengal) របស់ឥណ្ឌា បានរៀបចំការអង្គុយតវ៉ាពេញមួយយប់នៅថ្ងៃពុធ (១១ កញ្ញា) នេះ ដោយប្រឆាំងនឹងដីកាបង្គាប់ឱ្យត្រឡប់ទៅធ្វើការវិញរបស់តុលាការកំពូល ដើម្បីទាមទារយុត្តិធម៌ឱ្យគ្រូពេទ្យស្រ្តីម្នាក់ដែលត្រូវបានរំលោភសម្លាប់។

កាលពីថ្ងៃចន្ទ តុលាការកំពូល ដែលដោះស្រាយលើបញ្ហានេះបន្ទាប់ពីការផ្ទុះកំហឹងទូទាំងប្រទេស បានកំណត់កាលបរិច្ឆេទឱ្យគ្រូពេទ្យមានពេលរហូតដល់ថ្ងៃអង្គារ (១០ កញ្ញា) ម្សិលមិញនេះដើម្បីចូលធ្វើការវិញ បើមិនដូច្នេះទេពួកគេអាចប្រឈមមុខនឹង “វិធានការដាក់វិន័យយ៉ាងតឹងរ៉ឹង”។

វេជ្ជបណ្ឌិតរាប់ពាន់នាក់កំពុងទាមទារឱ្យមានសន្តិសុខកាន់តែប្រសើរឡើងនៅតាមមន្ទីរពេទ្យ និងយុត្តិធម៌សម្រាប់គ្រូពេទ្យស្ត្រីដែលត្រូវបានរំលោភសម្លាប់កាលពីថ្ងៃទី០៩ ខែសីហា នៅមហាវិទ្យាល័យវេជ្ជសាស្ត្រ R.G. Kar និងមន្ទីរពេទ្យនៅក្រុង កុលកាតា (Kolkata) រដ្ឋធានីរបស់រដ្ឋ។ ក្រុមគ្រូពេទ្យដែលតវ៉ាបាននិយាយថា ពួកគេនឹងធ្វើតាមដីការបស់តុលាការលុះត្រាតែការទាមទារត្រូវបានបំពេញ។

វេជ្ជបណ្ឌិតម្នាក់និយាយថា ពួកគេនឹងមិនបញ្ឃប់ការតវ៉ាទេរហូតទាល់តែមន្ត្រីជាន់ខ្ពស់នៃក្រសួងសុខាភិបាលដែលអនុញ្ញាតលើការសាងសង់នៅទីតាំងឧក្រិដ្ឋកម្មបានលាលែងពីតំណែង ដោយលើកឡើងថានោះជា “បរាជ័យ” ដ៏អយុត្តិធម៌សម្រាប់ជនរងគ្រោះ។

ការទាមទារផ្សេងទៀតរបស់គ្រូពេទ្យទាំងនោះរួមមាន វិធានការសុវត្ថិភាពកាន់តែប្រសើរឡើង រាប់ចាប់ពីបុគ្គលិកសន្តិសុខគ្រប់គ្រាន់ និងកាមេរ៉ាសុវត្ថិភាព (CCTV) រហូតដល់សេវាអ្នកជំងឺត្រឹមត្រូវនៅក្នុងមន្ទីរពេទ្យរដ្ឋាភិបាល និងការដកតំណែងប្រមុខនគរបាលក្រុង Kolkata៕