ប្រព័ន្ធផ្សព្វផ្សាយរដ្ឋរបស់អ៊ីរ៉ង់ បានរាយការណ៍ថា ប្រធានាធិបតីអ៊ីរ៉ង់ លោក Masoud Pezeshkian បានទៅដល់ទីក្រុងបាកដាដហើយ នៅថ្ងៃពុធ (ទី១១ ខែកញ្ញា) នេះ ដើម្បីបំពេញទស្សនកិច្ចផ្លូវការទៅកាន់ប្រទេសអ៊ីរ៉ាក់ ដែលជាសម្ព័ន្ធមិត្តយុទ្ធសាស្ត្រទាំងជាមួយទីក្រុងតេអេរ៉ង់ និងវ៉ាស៊ីនតោន ដោយនេះជាដំណើរក្រៅប្រទេសលើកដំបូងរបស់លោក។

ប្រទេសអ៊ីរ៉ាក់ជាមូលដ្ឋានរបស់ភាគី និងក្រុមប្រដាប់អាវុធជាច្រើនដែលគាំទ្រអ៊ីរ៉ង់ ខណៈទីក្រុងតេអេរ៉ង់បានបង្កើនឥទ្ធិពលរបស់ខ្លួនជាលំដាប់ នៅក្នុងប្រទេសផលិតប្រេងដ៏សំខាន់នេះ ចាប់តាំងពីការលុកលុយដឹកនាំដោយសហរដ្ឋអាមេរិក បានផ្តួលរំលំសត្រូវរបស់ខ្លួន គឺលោក Saddam Hussein ក្នុងឆ្នាំ២០០៣។

ក្នុងនាមជាដៃគូដ៏កម្រ ទាំងជាមួយសហរដ្ឋអាមេរិក និងអ៊ីរ៉ង់ ប្រទេសអ៊ីរ៉ាក់មានទាហានអាមេរិកចំនួន ២.៥០០នាក់ និងមានកងជីវពលគាំទ្រដោយអ៊ីរ៉ង់មានទំនាក់ទំនងជាមួយកងកម្លាំងសន្តិសុខរបស់ខ្លួន។ ប្រទេសនេះបានទទួលរងការវាយប្រហារកាន់តែខ្លាំងឡើងៗ គិតចាប់តាំងពីសង្គ្រាមអ៊ីស្រាអែល និងក្រុមហាម៉ាស បានផ្ទុះឡើង នៅតំបន់ហ្កាហ្សា ក្នុងខែតុលា។

ដោយត្រូវបានដកស្រង់សម្ដីដោយប្រព័ន្ធផ្សព្វផ្សាយរដ្ឋរបស់អ៊ីរ៉ង់ លោក Pezeshkian បាននិយាយនៅមុនទស្សនកិច្ចនេះថា៖ «យើងកំពុងរៀបចំផែនការ ដើម្បីចុះហត្ថលេខាលើកិច្ចព្រមព្រៀងជាច្រើន។ យើងនឹងជួបមន្ត្រីជាន់ខ្ពស់របស់ប្រទេសអ៊ីរ៉ាក់ជាច្រើនរូប នៅទីក្រុងបាកដាដ»។

ជាមួយគ្នានេះ ប្រព័ន្ធផ្សព្វផ្សាយរដ្ឋ បានឲ្យដឹងថា លោក Pezeshkian ក៏មានគម្រោងទៅទស្សនកិច្ចនៅតំបន់ Kurdistan របស់អ៊ីរ៉ាក់ ជាតំបន់ដែលអ៊ីរ៉ង់បានធ្វើការវាយប្រហារនាពេលកន្លងមក ដោយនិយាយថា ទីនេះត្រូវបានប្រើជាទីតាំងសម្រាប់ក្រុមបំបែកខ្លួនអ៊ីរ៉ង់ ក៏ដូចជាភ្នាក់ងាររបស់សត្រូវ គឺអ៊ីស្រាអែលផងដែរ៕