អតីតប្រធានាធិបតីប៉េរូ លោក អាល់ប៊ឺតតូ ហ្វ៊ូជីម៉ូរិ (Alberto Fujimori) ដែលបានដឹកនាំកំណើនសេដ្ឋកិច្ចក្នុងកំឡុងទសវត្សរ៍ឆ្នាំ១៩៩០ ប៉ុន្តែក្រោយមកត្រូវបានជាប់ពន្ធនាគារពីបទរំលោភសិទ្ធិមនុស្សដែលកើតចេញពីសង្រ្គាមដ៏បង្ហូរឈាមប្រឆាំងនឹងពួកឧទ្ទាមម៉ៅនិយម បានទទួលមរណភាពកាលពីថ្ងៃពុធ (១១ កញ្ញា) ក្នុងវ័យ ៨៦ឆ្នាំ។

សហសេវិកជិតស្និទ្ធដែលទៅសួរសុខទុក្ខលោកកាលពីព្រឹកនៅថ្ងៃដដែលនោះ បានរាយការណ៍ថាលោកបានស្ថិតក្នុងស្ថានភាពធ្ងន់ធ្ងរ។ កូនស្រីរបស់លោក គឺលោកស្រី គីកូ ហ្វ៊ូជីម៉ូរិ (Keiko Fujimori) បានបង្ហោះសារនៅលើបណ្ដាញសង្គម X ដែលបញ្ជាក់ដោយកូនៗផ្សេងទៀតរបស់អតីតមេដឹកនាំរូបនេះថា «បន្ទាប់ពីការតស៊ូជាមួយជំងឺមហារីកអស់ពេលជាយូរមក ឪពុករបស់យើងទើបតែបានចែកឋាននៅមុននេះ»។

លោក Fujimori ដែលជាកូនប្រុសរបស់ជនអន្តោប្រវេសន៍ជប៉ុន ធ្លាប់ជាថ្នាក់ដឹកនាំម្នាក់នៃសាកលវិទ្យាល័យកសិកម្មដែលមិនសូវល្បីឈ្មោះមួយ នៅពេលបានជាប់ឆ្នោតឱ្យកាន់តំណែងក្នុងឆ្នាំ១៩៩០។ លោកបានបង្កើតកេរ្ដិ៍ឈ្មោះឱ្យខ្លួនយ៉ាងឆាប់រហ័សជាអ្នកនយោបាយដ៏ឈ្លាសវៃ ដែលបែបបទដឹកនាំរបស់លោកបានបង្កើតលទ្ធផលជាក់ស្ដែង ទោះជាលោកបានធ្វើឱ្យអ្នករិះគន់ខឹងសម្បារចំពោះការប្រមូលផ្តុំអំណាចក៏ដោយ។

មិនយូរប៉ុន្មានបន្ទាប់ពីលោកបានឈ្នះឆ្នោតលើកទី៣ ក្នុងឆ្នាំ២០០០ មានការលេចធ្លាយរឿងអាស្រូវពីមន្រ្តីជំនិតរបស់លោកជុំវិញការសូកប៉ាន់អ្នកនយោបាយ ហើយលោក Fujimori ក៏បាននិរទេសខ្លួនទៅជប៉ុន។ លោកបានលាលែងពីតំណែងតាមទូរសារពីទីក្រុងតូក្យូ ហើយបន្ទាប់មកបានធ្វើយុទ្ធនាការមិនជោគជ័យសម្រាប់តំណែងព្រឹទ្ធសមាជិកនៅជប៉ុន។

លោក Fujimori មានសុវត្ថិភាពនៅជប៉ុន ដោយលោកជាពលរដ្ឋសញ្ជាតិពីរហើយទីក្រុងតូក្យូមិនធ្វើបត្យាប័នពលរដ្ឋខ្លួនទេ។ មនុស្សជាច្រើនមានការភ្ញាក់ផ្អើលនៅពេលដែលនៅឆ្នាំ២០០៥ លោកបានសម្រេចចិត្តត្រឡប់ទៅប៉េរូវិញក្នុងក្តីសង្ឃឹមនៃការលើកលែងទោស និងការវិលត្រឡប់ទៅកាន់នយោបាយវិញ៕