អាហ្វហ្គានីស្ថាន៖ អ្នកនាំពាក្យ​របស់​អង្គការសហប្រជាជាតិ​បាន​និយាយ​កាលពី​ថ្ងៃ​អង្គារ​ ទី​២១ ខែ​កញ្ញា​ថា រដ្ឋមន្ត្រី​ក្រសួងការបរទេស​ថ្មី​របស់​ក្រុម​តា​លី​បង់ បាន​ស្នើសុំ​ថ្លែង​ទៅកាន់​មេដឹកនាំ​ពិភព​លោក​នៅ​ក្នុង​កិច្ចប្រជុំ​មហាសន្និបាត​អង្គការសហប្រជាជាតិ​ នៅ​ទីក្រុង​ញូវយ៉ក​នៅ​សប្តាហ៍​នេះ។​

​ឯកអគ្គរដ្ឋទូត​រប​ស់​រដ្ឋាភិបាល​អា​ហ្វ​ហ្គា​នី​ស្ថាន ដែល​ត្រូវ​បាន​ក្រុម​តា​លី​បង់​បណ្តេញ​ចេញ​កាលពី​ខែ​មុន​ក៏បាន​ស្នើសុំ​ថ្លែង​ផងដែរ​ ដោយ​អង្គការសហប្រជាជាតិ​មិនទាន់​សម្រេច​នៅ​ឡើយ​​ទេ​ថា ​អ្នកណា​នឹង​តំណាង​ឲ្យ​ប្រទេស​នេះ​នៅ​ស្ថាប័ន​ពិភពលោក​មួយ​នេះ​។​ ​អ្នកនាំពាក្យ​របស់​អង្គការសហប្រជាជាតិ ​លោក Stephane Dujarric បាន​ប្រាប់​សារព័ត៌មាន AFP ថា ​គណៈកម្មាធិការ​ផ្ដល់​សារតាំង​ដែលមាន​សមាជិក ៩ប្រទេសនឹង​គ្រប់គ្រង​លើ​ការស្នើសុំ​នេះ ប៉ុន្តែ​គេ​មិន​ច្បាស់​ទេ​ថា ​តើគណៈកម្មាធិការ​នេះ​នឹង​ជួបគ្នាមុន​ការបញ្ចប់​កិច្ចប្រជុំ​នេះ ឬ​យ៉ាង​ណា​។​

​លោក Dujarric បាន​និយាយថា ​អគ្គលេខាធិការ​អង្គការសហប្រជាជាតិ ​លោក Antonio Guterres បានទទួល​លិខិត​មួយច្បាប់​ពី​ក្រុម​តា​លី​បង់ដែល​បានតែងតាំង​លោក Amir Khan Muttaqi ជាប្រេសិត​ថ្មី​ដើម្បី​ស្នើសុំ​ចូលរួម​ក្នុង​កិច្ចពិភាក្សា​កម្រិត​ខ្ពស់​នេះ​។​ ​លិខិត​នេះ​មិនបាន​បញ្ជាក់ថា ​តើ​លោក Muttaqi ចង់​ធ្វើដំណើរ​ទៅ​ញូវយ៉ក​ដើម្បី​ថ្លែង ឬថា​តើ​ក្រុម​តា​លី​បង់​នឹង​បញ្ជូន​សារ​ជា​វីដេអូ​ថត​ទុក​ដែរ ​ឬ​យ៉ាងណា ខណៈដែល​មេដឹកនាំ​ជាច្រើន​កំពុង​ធ្វើ​នៅ​ឆ្នាំនេះ​ដោយសារ​វិបត្តិ​ជំងឺ COVID-19៕

អត្ថបទ៖ សុខមាន