ប្រធានាធិបតីអ៊ុយក្រែន លោក Volodymyr Zelenskyy បានច្រានចោលគំនិតផ្តួចផ្តើមសន្តិភាពចិន-ប្រេស៊ីល សម្រាប់សង្គ្រាម នៅប្រទេសអ៊ុយក្រែន ដោយចាត់ទុកថា ជា «ការធ្វើឲ្យខូចប្រយោជន៍» ហើយបានប្រាប់ថា ទីក្រុងគីវ មិនបានចូលរួមក្នុងដំណើរការនេះទេ។

គួរបញ្ចាក់ថា ប្រទេសចិន និងប្រេស៊ីល បានអំពាវនាវកាលពីខែឧសភា ឲ្យមានសន្និសីទសន្តិភាពអន្តរជាតិមួយ ដែលត្រូវបានទទួលស្គាល់ទាំងរុស្ស៊ី និងអ៊ុយក្រែន ដោយមានការចូលរួមស្មើៗគ្នាពីគ្រប់ភាគី និងអ្វីដែលគេហៅថា ការពិភាក្សាដោយយុត្តិធម៌នៃផែនការសន្តិភាពទាំងអស់។

នៅក្នុងបទសម្ភាសន៍មួយដែលត្រូវបានបង្ហោះកាលពីថ្ងៃពុធ (ទី១១ ខែកញ្ញា) ដោយប្រព័ន្ធផ្សព្វផ្សាយប្រេស៊ីល Metropoles លោក Zelenskyy បានលើកឡើងថា៖ «សំណើរបស់ចិន-ប្រេស៊ីល គឺជារឿងធ្វើឲ្យខាតប្រយោជន៍។ នេះគ្រាន់តែជាសេចក្តីថ្លែងការណ៍នយោបាយប៉ុណ្ណោះ។ តើអ្នកអាចផ្តល់ជូននូវគំនិតផ្តួចផ្តើមនេះថា ជារបស់ពួកយើង ដោយមិនចាំបាច់សួរអ្វីពីពួកយើងបានដោយរបៀបណា?»។

បើយោងតាមខ្សែវីដេអូដែលបង្ហោះដោយប្រព័ន្ធផ្សព្វផ្សាយ Metropoles បានបង្ហាញថា លោក Zelenskyy បានបន្ថែមថា គំនិតផ្តួចផ្តើមនេះខ្វះការគោរព ចំពោះអ៊ុយក្រែន និងបូរណភាពទឹកដីរបស់ខ្លួន ហើយថា ប្រធានាធិបតីរុស្ស៊ីលោក Vladimir Putin ត្រូវតែចាត់វិធានការ ដើម្បីបង្ហាញថា លោកចង់បញ្ចប់សង្រ្គាម។ 

មេដឹកនាំអ៊ុយក្រែនរូបនេះ បានបញ្ជាក់ថា លោកបានផ្តល់ការពិភាក្សាលើសំណើនានា ជាមួយប្រទេសចិន និងប្រេស៊ីល៕