ប្រធានាធិបតីប្រទេសសេណេហ្គាល់ លោក បាស៊ី ឌីម៉ាយ ហ្វាយ(Bassirou Diomaye Faye) កាលពីថ្ងៃព្រហស្បតិ៍ ទី ១២ ខែកញ្ញា បានរំលាយសភាជាតិដែលដឹកនាំដោយគណបក្សប្រឆាំង ដោយត្រួសត្រាយផ្លូវសម្រាប់ការបោះឆ្នោតសភាមុនកាលកំណត់ និងសម្រាប់រដ្ឋាភិបាលរបស់លោក ក្នុងការដាក់ចេញនូវគោលនយោបាយរបស់ខ្លួន សម្រាប់រយៈពេលអាណត្តិដែលនៅសល់របស់ខ្លួន។

នៅក្នុងសុន្ទរកថា លោក ហ្វាយ(Faye) ជាអ្នកដែលបានឡើងកាន់តំណែងកាលពីខែមេសា បាននិយាយថា ការបោះឆ្នោតសភានឹងធ្វើឡើងនៅថ្ងៃទី១៧ ខែវិច្ឆិកា ឆ្នាំ២០២៤។

កាលពីថ្ងៃព្រហស្បតិ៍ គឺជាខួបពីរឆ្នាំសម្រាប់សភា ជារយៈពេលអប្បបរមាដែលត្រូវតែកន្លងផុត នៅមុនពេលសភាថ្មី ត្រូវបានបោះឆ្នោត។

ចំណាត់ការ កាលពីថ្ងៃព្រហស្បតិ៍ ធ្វើឡើងបន្ទាប់ពីការសន្យាកាលពីពេលមុន ដោយនាយករដ្ឋមន្រ្ដីលោក Ousmane Sonko ដើម្បីរំលាយសភាជាតិ និងបើកការស៊ើបអង្កេតឲ្យបានទូលំទូលាយ លើអំពើពុករលួយរបស់រដ្ឋាភិបាល។

លោក ហ្វាយ(Faye) បានទទួលជ័យជម្នះភ្លូកទឹកភ្លូកដីកាលពីខែមីនា ដោយសន្យាថានឹងបង្ក្រាបអំពើពុករលួយ និងដាក់ចេញកំណែទម្រង់សេដ្ឋកិច្ចដែលផ្តល់អាទិភាពដល់ផលប្រយោជន៍ជាតិ។