សេតវិមាន កាលពីថ្ងៃព្រហស្បតិ៍ (ទី១២ ខែកញ្ញា) បានឲ្យដឹងថា ប្រធានាធិបតីអាមេរិក លោក Joe Biden នឹងធ្វើជាម្ចាស់ផ្ទះទទួលមេដឹកនាំនៃប្រទេសសម្ព័ន្ធមិត្ត ដែលមានអូស្ត្រាលី ឥណ្ឌា និងជប៉ុន នៅទីក្រុង Wilmington រដ្ឋ Delaware នាថ្ងៃទី២១ ខែកញ្ញា សម្រាប់កិច្ចពិភាក្សាផ្តោតលើភាពតានតឹងជាមួយប្រទេសចិន។

កិច្ចប្រជុំកំពូលនេះធ្វើឡើងនៅពេលដែលលោក Biden សម្លឹងដល់កេរដំណែលគោលនយោបាយការបរទេសរបស់លោក ក្នុងប៉ុន្មានខែចុងក្រោយ ក្នុងនាមជាប្រធានាធិបតីមួយអាណត្តិ បន្ទាប់ពីបានដកខ្លួនចេញពីការបោះឆ្នោត នៅសហរដ្ឋអាមេរិកឆ្នាំ២០២៤ និងបានប្រគល់តំណែងបេក្ខជនតំណាងគណបក្សប្រជាធិបតេយ្យទៅឲ្យអនុប្រធានាធិបតី គឺលោកស្រី Kamala Harris។

អ្នកនាំពាក្យរបស់លោក គឺលោកស្រី Karine Jean- Pierre បានឲ្យដឹងនៅក្នុងសេចក្តីថ្លែងការណ៍ថា៖ «នេះនឹងក្លាយជាលើកទី១ របស់ប្រធានាធិបតី លោក Biden ដែលធ្វើជាម្ចាស់ផ្ទះទទួលមេដឹកនាំបរទេសនៅទីក្រុង Wilmington ក្នុងនាមជាប្រធានាធិបតី ដែលជាការឆ្លុះបញ្ចាំងពីទំនាក់ទំនងផ្ទាល់ខ្លួនដ៏ជ្រាលជ្រៅរបស់លោកជាមួយបណ្ដាមេដឹកនាំម្នាក់ៗ នៅក្នុងសម្ព័ន្ធ Quad និងបង្ហាញពីសារៈសំខាន់របស់ Quad សម្រាប់ប្រទេសរបស់យើងទាំងអស់គ្នា»។

លោក Biden «ទន្ទឹងរង់ចាំ» ស្វាគមន៍នាយករដ្ឋមន្ត្រីអូស្ត្រាលី លោក Anthony Albanese នាយករដ្ឋមន្ត្រីឥណ្ឌា លោក Narendra Modi និងនាយករដ្ឋមន្ត្រីជប៉ុន លោក Fumio Kishida។ ការបង្កើតក្រុម Quad ដែលមាន ៤ប្រទេស មានតាំងពីឆ្នាំ២០០៧ ប៉ុន្តែលោក Biden បានជំរុញយ៉ាងខ្លាំងក្លាដល់សម្ព័ន្ធភាពនេះ ជាផ្នែកមួយនៃការសង្កត់ធ្ងន់លើសម្ព័ន្ធភាពអន្តរជាតិ ដើម្បីទប់ទល់នឹងសត្រូវ ជាពិសេសប្រទេសចិន។

សេចក្តីថ្លែងការណ៍របស់សេតវិមានមិនបានលើកឡើងច្បាស់ៗពីប្រទេសចិននោះទេ ប៉ុន្តែបាននិយាយថា មេដឹកនាំ នឹងផ្តោតលើ «ការជំរុញចក្ខុវិស័យរួមរបស់ប្រទេសទាង៤ អំពីតំបន់ឥណ្ឌូប៉ាស៊ីហ្វិកសេរី និងបើកចំហ»៕