ក្រសួងការពារជាតិនៅទីក្រុងតូក្យូ នៅថ្ងៃសុក្រ (ទី១៣ ខែកញ្ញា) នេះ បានឲ្យដឹងថា ប្រទេសជប៉ុន បានប្រញាប់ប្រញាល់បញ្ចេញយន្តហោះចម្បាំង បន្ទាប់ពីយន្តហោះរុស្ស៊ី បានហោះក្រឡឹងជុំវិញប្រជុំកោះនេះ ជាលើកដំបូង ក្នុងរយៈពេល ៥ឆ្នាំ។

ចាប់ពីពេលព្រឹក ដល់រសៀលថ្ងៃព្រហស្បតិ៍ (ទី១២ ខែកញ្ញា) យន្តហោះរុស្ស៊ី Tu-142 បានហោះចេញពីសមុទ្រ រវាងប្រទេសជប៉ុន និងកូរ៉េខាងត្បូងឆ្ពោះទៅកាន់តំបន់អូគីណាវ៉ាភាគខាងត្បូង។ នេះបើយោងតាមសេចក្តីថ្លែងការណ៍របស់ក្រសួងការពារជាតិ។

ក្រសួងបានបន្ថែមថា បន្ទាប់មក យន្តហោះទាំងនោះបានហោះសំដៅទៅភាគខាងជើងពីខាងលើមហាសមុទ្រប៉ាស៊ីហ្វិក ដើម្បីបញ្ចប់ដំណើរហោះហើររបស់ខ្លួន នៅម្ដុំភាគខាងជើងនៃកោះហុកកៃដូ (Hokkaido)។

មន្ត្រីបាននិយាយថា យន្តហោះទាំងនោះ មិនបានចូលទៅក្នុងដែនអាកាសរបស់ជប៉ុនទេ ប៉ុន្តែបានហោះពីលើដែនដីដែលមានជម្លោះ រវាងជប៉ុន និងរុស្ស៊ី។

សេចក្តីថ្លែងការណ៍របស់ក្រសួង បានឲ្យដឹងថា៖ «ជាការឆ្លើយតប យើងបានប្រមូលផ្ដុំយន្តហោះចម្បាំងរបស់កងកម្លាំងការពារស្វ័យការពារអាកាស នៅមូលដ្ឋានសង្គ្រោះបន្ទាន់»។

មន្ត្រីក្រសួងបានប្រាប់សារព័ត៌មាន AFP នៅថ្ងៃសុក្រថា វត្តមានយន្តហោះយោធារុស្ស៊ីលើកចុងក្រោយ ដែលបានហោះក្រឡឹងជុំវិញប្រទេសជប៉ុន គឺនៅឆ្នាំ២០១៩ ប៉ុន្តែហេតុការណ៍នោះ ពាក់ព័ន្ធនឹងយន្តហោះទម្លាក់គ្រាប់បែកដែលមិនបានចូលដែនអាកាសរបស់ប្រទេសនោះឡើយ។

នៅដើមសប្តាហ៍នេះ នាវាចម្បាំងរុស្ស៊ី និងចិន បានចាប់ផ្តើមធ្វើសមយុទ្ធរួមគ្នា នៅសមុទ្រជប៉ុន។ សមយុទ្ធនេះ គឺជាផ្នែកមួយនៃសមយុទ្ធកងទ័ពជើងទឹកដ៏ធំ ដែលប្រធានាធិបតីរុស្ស៊ីលោក វ្ល៉ាឌីមៀរ ពូទីន បានពណ៌នាថា ជាសមយុទ្ធដ៏ធំបំផុត ក្នុងរយៈពេល ៣ទសវត្សរ៍៕