បាល់ទាត់៖ ការប្រកួតកីឡាបាល់ទាត់ជម្រើសជើងឯកជាតិកម្ពុជា ២០២១ រឺមិត្តហ្វូនខាំបូឌានលីគថ្ងៃនេះមានតែមួយប្រកួតទេ ដោយក្លិបបាល់ទាត់កងយោធពលខេមរភូមិន្ទ ទទួលម្ចាស់ជើងឯកបឹងកេតនៅស្តាតចាស់ម៉ោង ៣និង៣០នាទីរសៀលហើយផ្សាយផ្ទាល់តាមទូរទស្សន៍ប៊ីធីវី។
ក្លិបទាំងពីរល្អដូចគ្នាប្រកួតចុងក្រោយសុទ្ធតែឈ្នះដូចគ្នា ក្នុងនោះកងយោធពលខេមរភូមិន្ទ ឈ្នះគិរីវង់សុខសែនជ័យ ៣ទល់នឹង១ នៅទឹកដីរបស់ខ្លួន ខណៈបឹងកេតឈ្នះវិសាខា ២ទល់នឹង១ ក្រៅដីដោយគ្រាប់បាល់ ចាន់ វឌ្ឍនាកា ទាំងពីរគ្រាប់។ ប្រាំប្រកួតចុងក្រោយកងយោធពលខេមរភូមិន្ទឈ្នះ ២ប្រកួត ស្មើ២ និងចាញ់ ១ប្រកួត ឯបឹងកេតឈ្នះ ៤ប្រកួត និងចាញ់ ១ប្រកួត។ ជើងទី១ បឹងកេតឈ្នះកងយោធពលខេមរភូមិន្ទ ២ទល់នឹង០។ ក្រោយលេងបាន ១៣ប្រកួតរៀងខ្លួន បឹងកេតឈរនៅលេខ៥ មាន ២៧ពិន្ទុ រីឯទីហ្វីអាមីលេខ៦ មាន ២២ពិន្ទុ។ ប្រកួតថ្ងៃនេះម្ចាស់ផ្ទះកងយោធពលខេមរភូមិន្ទអវត្តមានកីឡាករឆ្នើម កាន់ ពិសាល និងខ្សែការពារ វិចិត្រ ដោយសារជាប់ពិន័យ។ ចំនែកបឹងកេតមិនមានបញ្ហាកីឡាករនោះទេ ខណៈ ចាន់ វឌ្ឍនាកា កំពុងបង្ហាញទម្រង់លេងយ៉ាងល្អ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
