ប្រទេសចិន នៅថ្ងៃសៅរ៍ (ទី១៤ ខែកញ្ញា) នេះ បានចោទប្រកាន់ទីក្រុងប៊ែរឡាំងពីការបង្កើនហានិភ័យសន្តិសុខ នៅក្នុងច្រកសមុទ្រតៃវ៉ាន់ ដោយការលើកឡើងនេះកើតមានមួយថ្ងៃបន្ទាប់ពីនាវាអាល្លឺម៉ង់ ២គ្រឿង បានធ្វើដំណើរឆ្លងកាត់ដែនទឹកដ៏រសើបនេះ។

អ្នកនាំពាក្យយោធាចិន លោក Li Xi បានឲ្យដឹងនៅក្នុងសេចក្តីថ្លែងការណ៍ថា៖ «ទង្វើរបស់ភាគីអាល្លឺម៉ង់ បង្កើនហានិភ័យសន្តិសុខ និងបញ្ជូននូវសញ្ញាមិនត្រឹមត្រូវ»។ លោក Li បានបន្ថែមថា កងទ័ពរបស់ទីក្រុងប៉េកាំង នៅក្នុងតំបន់ នឹង «ប្រឆាំងដាច់ខាតរាល់ការគំរាមកំហែង និងការបង្កហេតុទាំងអស់»។

រដ្ឋមន្ត្រីការពារជាតិអាល្លឺម៉ង់ លោក Boris Pistorius កាលពីថ្ងៃសុក្រ (ទី១៣ ខែកញ្ញា) បានបញ្ជាក់ថា នាវាចម្បាំងខ្នាតតូច Baden-Wuerttemberg និងនាវាផ្ដល់សម្ភារផ្គត់ផ្គង់ Frankfurt am Main បានបើកឆ្លងកាត់ច្រកសមុទ្រនេះ។

នាវាយោធាអាមេរិក ក៏ដូចជានាវាដែលប្រតិបត្តិការដោយប្រទេសផ្សេងទៀត តែងតែធ្វើដំណើរឆ្លងកាត់ផ្លូវទឹកដ៏រសើបនេះ។ ប៉ុន្តែបើយោងតាមរបាយការណ៍របស់ប្រព័ន្ធផ្សព្វផ្សាយអាល្លឺម៉ង់ ការធ្វើដំណើររបស់នាវា Baden-Wuerttemberg គឺជាលើកដំបូងហើយ រយៈពេលជាង ២ទសវត្សរ៍ ដែលកងទ័ពជើងទឹករបស់ទីក្រុងប៊ែរឡាំង បានធ្វើដូច្នេះ។

នៅថ្ងៃទី១៤ ខែកញ្ញានេះ លោក Li បាននិយាយថា កងទ័ពរំដោះប្រជាជនចិន បានបញ្ជូនកងកម្លាំងដែនសមុទ្រ និងអាកាសទៅ «ត្រួតពិនិត្យ និងផ្ដល់ការព្រមាន» ដល់នាវាអាល្លឺម៉ង់៕