មេដឹកនាំជាន់ខ្ពស់វៀតណាម និងឥណ្ឌូនេស៊ី បានព្រមព្រៀងគ្នាធ្វើយ៉ាងណាបង្កើនទំហំពាណិជ្ជកម្មទ្វេភាគីឲ្យឡើងដល់ ១៨ពាន់លានដុល្លារ នៅឆ្នាំ២០២៨ ខណៈដែលយល់ព្រមពង្រីកកិច្ចសហប្រតិបត្តិការលើគ្រប់វិស័យ ដើម្បីលើកកម្ពស់បន្ថែមទៀតដល់ភាពជាដៃគូយុទ្ធសាស្ត្រ រវាងប្រទេសទាំង២។

កិច្ចព្រមព្រៀងនេះ ត្រូវបានសម្រេចកាលពីថ្ងៃសុក្រ (ទី១៣ ខែកញ្ញា) រវាងអគ្គលេខាបក្ស និងជាប្រមុខរដ្ឋវៀតណាម លោក To Lam និងប្រធានាធិបតីជាប់ឆ្នោតឥណ្ឌូនេស៊ី លោក Prabowo Subianto ដែលបានទៅដល់ទីក្រុងហាណូយ ក្នុងថ្ងៃដដែលនោះ ដើម្បីបំពេញទស្សនកិច្ចការងាររយៈពេល ២ថ្ងៃ។

ដោយវាយតម្លៃខ្ពស់ ចំពោះដំណើរទស្សនកិច្ចរបស់លោក Subianto លោក Lam បានអបអរសាទរដល់ប្រទេសឥណ្ឌូនេស៊ី ក្នុងទិវាបុណ្យជាតិលើកទី៧៩ របស់ខ្លួន (កាលពីថ្ងៃទី១៧ ខែសីហា) និងបានកោតសរសើរ ចំពោះសមិទ្ធិផលថ្មីៗរបស់ប្រទេសនេះ ក្នុងការអភិវឌ្ឍន៍សេដ្ឋកិច្ចសង្គម ក៏ដូចជាការរួមចំណែកចំពោះសន្តិភាព និងកិច្ចសហប្រតិបត្តិការ ក្នុងតំបន់ និងពិភពលោកផងដែរ។

ចំណែកប្រធានាធិបតីជាប់ឆ្នោត លោក Subianto បានថ្លែងអំណរគុណ ចំពោះការស្វាគមន៍យ៉ាងកក់ក្តៅ និងអបអរសាទរវៀតណាម ចំពោះសមិទ្ធិផលសំខាន់ៗ ក្នុងការអភិវឌ្ឍន៍សេដ្ឋកិច្ច និងការពង្រឹងជំហររបស់ខ្លួនលើឆាកអន្តរជាតិ។ លើសពីនេះទៀត លោកក៏បានចូលរួមរំលែកទុក្ខយ៉ាងក្រៀមក្រំផងដែរ ចំពោះការបាត់បង់ និងការខូចខាតដ៏ធំធេង ដែលបណ្តាលមកពីព្យុះទីហ្វុង Yagi នៅប្រទេសវៀតណាម។

គួរបញ្ជាក់ថា មេដឹកនាំទាំង២ បានបញ្ជាក់ពីការប្តេជ្ញាចិត្តក្នុងការនាំទំហំពាណិជ្ជកម្មទ្វេភាគីឲ្យឡើងដល់ ១៨ពាន់លានដុល្លារ នៅឆ្នាំ២០២៨ តាមរយៈសកម្មភាពជំរុញពាណិជ្ជកម្ម ការគាំទ្រពាណិជ្ជកម្ម រវាងធុរកិច្ចនៃប្រទេសទាំង២ ហើយនិងលុបបំបាត់ឧបសគ្គ ចំពោះពាណិជ្ជកម្មទ្វេភាគី៕