​បាល់ទាត់៖ ​ពង្រាង​កាលវិភាគ​ប្រកួត​រដូវ​កាល​ក្រោយ​នៃ​ក្របខណ្ឌ English Premier League ត្រូវ​បាន​បែក​ធ្លាយ​ដែល​គេ​មើល​ឃើញ​ថា ​ពេញ​ដោយ​ភាព​មមាញឹក​មុន និង​ក្រោយ World Cup ២០២២ ដែល​ធ្វើ​ឡើង​នៅ​ទឹកដី​កាតា​។

​​២០២២-២០២៣ នឹង​ជា​រដូវ​កាល​ដ៏​ចម្រូងចម្រាស​នៃ​កាលវិភាគ​ប៉ះគ្នា​រវាង​លី​គ​ក្នុងស្រុក និង​ការប្រកួត​អន្តរជាតិ​របស់​ក្រុម​ជំរើសជាតិ មិន​មែន​តែ​អង់គ្លេស​ទេគឺ​ភាគច្រើន​នៃ​លី​គ​ធំៗ​នៅ​តំបន់​អឺរ៉ុប​។​ ​​ឆ្នាំ​ក្រោយនេះ World Cup ២០២២ នឹង​ដំណើរការឡើង​ខុសប្លែក​ពី​រាល់ដង​ដោយ​នឹង​ចាប់ផ្តើម​ពីថ្ងៃ​ទី២១ ខែវិច្ឆិកា​ដល់​ថ្ងៃទី១៨ ខែធ្នូ​។ ​​សេចក្តីព្រាង​កាលវិភាគ​របស់​ក្របខណ្ឌ​បាល់ទាត់​អង់គ្លេស Premier League ត្រូវបាន​បែកធ្លាយ​ដូចតទៅ​៖ ​​ថ្ងៃទី៦ ខែសីហា ២០២២ English Premier League ចាប់ផ្តើម​រដូវ​កាល​ថ្មី​ដោយ​ត្រូវ​ប្រកួត​ឱ្យ​គ្រប់ ១៦ជុំ​មុន World Cup មកដល់​នៅ​ខែវិច្ឆិកា​។ ​​ថ្ងៃទី២ ខែវិច្ឆិកា ២០២២ UEFA ឯណោះ​វិញ​មាន​គំរោង​ធ្វើយ៉ាងណា​ឱ្យ​ចប់​ការប្រកួត​ទាំង ៦ជុំ​ក្នុង​ពូ​ល​នៃ​ក្របខណ្ឌ UEFA Champions League និង UEFA Champions League​។ ថ្ងៃទី១២ និង ១៣ ខែវិច្ឆិកា​ឆ្នាំ២០២២ ជុំ​ទី១៦ របស់ Premier League ត្រូវ​បញ្ចប់​មានន័យថា ​ថ្ងៃទី១៤ ខែ​ដដែល​កីឡាករ​អាច​បំបែកជួរ​គ្នា​ទៅ​ប្រមូលផ្តុំ​ជាមួយ​ក្រុម​ជំរើសជាតិ​ត្រឹម ១សប្តាហ៍​ប៉ុណ្ណោះ​មុន World Cup​។

ថ្ងៃទី២១ ខែវិច្ឆិកា​ដល់​ថ្ងៃទី១៨ ខែធ្នូ ២០២២ World Cup ដំណើរការ ប៉ុន្តែ​ក្នុង​ចន្លោះ​នោះ​ថ្ងៃទី៤ ខែធ្នូ​ក្របខណ្ឌ League Championship អង់គ្លេស​បន្តដំណើរ​កា​រ​ក្រោយ World Cup បញ្ចប់​វគ្គ​វិលជុំ​ក្នុង​ពូ​ល​។ ​​ថ្ងៃទី២៦ ខែធ្នូ ២០២២ Premier League នឹង​ចាប់ផ្តើម​បន្ត​ប្រកួត ២២ជុំ​ដែល​នៅសល់​ឱ្យ​ចប់​ត្រឹម​ចុងខែ​ឧសភា ឆ្នាំ២០២៣ ពោលគឺ​ថ្ងៃទី២៨ ខែឧសភា​ឆ្នាំ២០២៣ គឺជា​ជុំ​ចុងក្រោយ​នៃ​ក្របខណ្ឌ English Premier League​។​ ​ថ្ងៃទី៣ ខែមិថុនា ២០២៣ ជាការ​ប្រកួត​វគ្គ​ផ្តាច់ព្រ័ត្រ FA Cup​។ ​​ថ្ងៃទី១០ ខែមិថុនា​ឆ្នាំ២០២៣ ជាការ​ប្រកួត​វគ្គ​ផ្តាច់ព្រ័ត្រ UEFA Champions League​។ ​​សូមបញ្ជាក់ថា ​ពង្រាង​កាលវិភាគ​ប្រកួត​នេះ​នឹងត្រូវ​បញ្ជូនទៅ​បណ្តា​ក្លិប​ឆាប់ៗ​នេះ ដើម្បី​ត្រៀមខ្លួន​ឱ្យបាន​ល្អ ជាពិសេស​គំរោង​ផែនការ​ក្លិប​សំរាប់​រដូវ​កាល​ដ៏​មមាញឹក​ឆ្នាំ​ក្រោយនេះ​៕

​អត្ថបទ​៖​នាង សុភា​វុ​ធ